kab juda hai mujhse dilbar kab main dilbar se juda

kab judā hai mujh se dilbar kab maiñ dilbar se judā

ho na gauhar aab se aur aab gauhar se judā

ruuh tan se jaañ badan se hosh hai sar se judā

kyā kashākash meñ phañsā huuñ jab se dilbar se judā

ho ga.ī barbād miTTī mil gayā maiñ ḳhaak meñ

jab huā naqsh-e-qadam kī tarah us dar se judā

hashr meñ kis kī garebāñ-gīr hogī ai ḳhudā

kyoñ huī ḳhaak apnī dāmān-e-sitamgar se judā

kyā hī tāle.a kā sitāra hai nahūsat meñ mirā

ho gayā vo maah jaise mujh bad-aḳhtar se judā

laḳht-e-dil aage chalā pīchhe ravāñ hai fauj-e-ashk

ho nahīñ saktā ye lashkar apne afsar se judā

jāgne se ġhair ke hamdam kaheñ kyā raat bhar

ham ko vo tarse judā aur un ko ham tarse judā

josh par hai chashm-e-tar vahshat na le jā so.e dasht

mausam-e-bārish meñ ham hoñ kis tarah ghar se judā

kab bache jab bahr-e-shor-afzā meñ ik tifl-e-saġhīr

ho talātum meñ kahīñ dast-e-shanāvar se judā

paa.e vo qa.ar-e-jahannum meñ jagah apnī vahāñ

yaañ ho jis kā haath dāmān-e-payambar se judā

garche hai kam-fursatī 'daula' ġhazal kah aur bhī

in dinoñ az-bas hai tū shoḳh-e-sitamgar se judā

kab juda hai mujh se dilbar kab main dilbar se juda

ho na gauhar aab se aur aab gauhar se juda

ruh tan se jaan badan se hosh hai sar se juda

kya kashakash mein phansa hun jab se dilbar se juda

ho gai barbaad miTTi mil gaya main KHak mein

jab hua naqsh-e-qadam ki tarah us dar se juda

hashr mein kis ki gareban-gir hogi ai KHuda

kyon hui KHak apni daman-e-sitamgar se juda

kya hi talea ka sitara hai nahusat mein mera

ho gaya wo mah jaise mujh bad-aKHtar se juda

laKHt-e-dil aage chala pichhe rawan hai fauj-e-ashk

ho nahin sakta ye lashkar apne afsar se juda

jagne se ghair ke hamdam kahen kya raat bhar

hum ko wo tarse juda aur un ko hum tarse juda

josh par hai chashm-e-tar wahshat na le ja soe dasht

mausam-e-barish mein hum hon kis tarah ghar se juda

kab bache jab bahr-e-shor-afza mein ek tifl-e-saghir

ho talatum mein kahin dast-e-shanawar se juda

pae wo qar-e-jahannum mein jagah apni wahan

yan ho jis ka hath daman-e-payambar se juda

garche hai kam-fursati 'daula' ghazal kah aur bhi

in dinon az-bas hai tu shoKH-e-sitamgar se juda