kabhi makan ki taraf hai kabhi makin ki taraf

kabhī makāñ kī taraf hai kabhī makīñ kī taraf

kisī kā ruḳh hai azal se mirī zamīñ kī taraf

charāġh-e-lāla hai raushan na surḳh rū-e-hinā

fazā-e-sehn-e-gulistāñ hai yāsmīñ kī taraf

mire badan ne bhī is faisle pe saad kiyā

ki dāġh-e-sajda rahegā faqat jabīñ kī taraf

tuyūr-e-ḳhvāb hoñ ā.īne hoñ sitāre hoñ

ravāñ-davāñ haiñ sabhī arsh-e-nīlamīñ kī taraf

huā hai koī agar faisla mire haq meñ

kabhī maiñ haañ kī taraf thā kabhī nahīñ kī taraf

badal na pā.ūñgā maiñ āsmāñ badalne se

mirā jhukāv rahegā usī hasīñ kī taraf

dayār-e-dil kā añdherā agar chhaTā 'sājid'

to dhyān jā.egā us sham-e-avvalīñ kī taraf

kabhi makan ki taraf hai kabhi makin ki taraf

kisi ka ruKH hai azal se meri zamin ki taraf

charagh-e-lala hai raushan na surKH ru-e-hina

faza-e-sehn-e-gulistan hai yasmin ki taraf

mere badan ne bhi is faisle pe sad kiya

ki dagh-e-sajda rahega faqat jabin ki taraf

tuyur-e-KHwab hon aaine hon sitare hon

rawan-dawan hain sabhi arsh-e-nilamin ki taraf

hua hai koi agar faisla mere haq mein

kabhi main han ki taraf tha kabhi nahin ki taraf

badal na paunga main aasman badalne se

mera jhukaw rahega usi hasin ki taraf

dayar-e-dil ka andhera agar chhaTa 'sajid'

to dhyan jaega us sham-e-awwalin ki taraf