kahan jaen chhoD ke hum use koi aur uske siwa bhi hai

kahāñ jaa.eñ chhoḌ ke ham use koī aur us ke sivā bhī hai

vahī dard-e-dil bhī hai dosto vahī dard-e-dil kī davā bhī hai

mirī kashtī laakh bhañvar meñ hai na karūñgā maiñ tirī minnateñ

ye patā nahīñ tujhe nāḳhudā mire saath merā ḳhudā bhī hai

ye adā bhī us kī ajiib hai ki baḌhā ke hausla-e-nazar

mujhe izn-e-dīd diyā bhī hai mire dekhne pe ḳhafā bhī hai

mirī samt mahfil-e-ġhair meñ vo adā-e-nāz se dekhnā

jo ḳhatā-e-ishq kī hai sazā to mirī vafā kā sila bhī hai

jo hujūm-e-ġham se hai aañkh nam to laboñ pe naale haiñ dam-ba-dam

use kis tarah se chhupā.eñ ham kahīñ rāz-e-ishq chhupā bhī hai

ye bajā ki 'aḳhtar'-e-muslimī hai zamāne bhar se burā magar

use dekhiye jo ḳhulūs se to bhaloñ meñ ek bhalā bhī hai

kahan jaen chhoD ke hum use koi aur us ke siwa bhi hai

wahi dard-e-dil bhi hai dosto wahi dard-e-dil ki dawa bhi hai

meri kashti lakh bhanwar mein hai na karunga main teri minnaten

ye pata nahin tujhe naKHuda mere sath mera KHuda bhi hai

ye ada bhi us ki ajib hai ki baDha ke hausla-e-nazar

mujhe izn-e-did diya bhi hai mere dekhne pe KHafa bhi hai

meri samt mahfil-e-ghair mein wo ada-e-naz se dekhna

jo KHata-e-ishq ki hai saza to meri wafa ka sila bhi hai

jo hujum-e-gham se hai aankh nam to labon pe nale hain dam-ba-dam

use kis tarah se chhupaen hum kahin raaz-e-ishq chhupa bhi hai

ye baja ki 'aKHtar'-e-muslimi hai zamane bhar se bura magar

use dekhiye jo KHulus se to bhalon mein ek bhala bhi hai