kahin maujen sulagti hain kahin tufan jalte hain

kahīñ maujeñ sulagtī haiñ kahīñ tūfān jalte haiñ

tirī furqat meñ ham se saikḌoñ insān jalte haiñ

jo kal tak phuul barsāte rahe haiñ apnī rāhoñ meñ

vahī hamdard ab ham se ba-har 'unvān jalte haiñ

ḳhudā ke nek bande aaj bhī sāġhar-ba-kaf nikle

hamārī bāda-noshī se magar shaitān jalte haiñ

hamāre dil bhī ab kuchh is tarah jalte haiñ sīnoñ meñ

amīroñ ke gharoñ meñ jaise ātish-dān jalte haiñ

charāġh-e-ārzū se raushnī hai dil kī bastī meñ

tamanna kī tapish pā kar yahāñ armān jalte haiñ

machalte haiñ idhar saaqī udhar sāġhar khanakte haiñ

guloñ kī sho'la-sāmānī se jab guldān jalte haiñ

shikam kī aag meñ insāniyat ke naam par 'zaidī'

kahīñ mazdūr jalte haiñ kahīñ dahqān jalte haiñ

kahin maujen sulagti hain kahin tufan jalte hain

teri furqat mein hum se saikDon insan jalte hain

jo kal tak phul barsate rahe hain apni rahon mein

wahi hamdard ab hum se ba-har 'unwan jalte hain

KHuda ke nek bande aaj bhi saghar-ba-kaf nikle

hamari baada-noshi se magar shaitan jalte hain

hamare dil bhi ab kuchh is tarah jalte hain sinon mein

amiron ke gharon mein jaise aatish-dan jalte hain

charagh-e-arzu se raushni hai dil ki basti mein

tamanna ki tapish pa kar yahan arman jalte hain

machalte hain idhar saqi udhar saghar khanakte hain

gulon ki sho'la-samani se jab guldan jalte hain

shikam ki aag mein insaniyat ke nam par 'zaidi'

kahin mazdur jalte hain kahin dahqan jalte hain