kai bar unki mahfil mein hamara zikr-e-KHair aaya

ka.ī baar un kī mahfil meñ hamārā zikr-e-ḳhair aaya

magar iz.hār-e-lutf-e-dost-dārī ke baġhair aaya

samajhtā huuñ ye sang-e-rāh kā'ba hai samajhtā huuñ

magar shaam aa.ī aur maiñ lauT kar phir sū-e-dair aaya

jamāl-e-dost se pur-nūr hai duniyā-e-dil merī

ḳhayāl-e-dost is ghar meñ takalluf ke baġhair aaya

na Dar girdāb-e-ġham kā hai na tūfān-e-havādis kā

dil-e-āzād in maujoñ meñ lākhoñ baar tair aaya

jhalakte haiñ mizha par ashk-e-dil sajde luTātā hai

zabān-e-be-kasī par aaj kis kā zikr-e-ḳhair aaya

rah-e-hastī meñ sau mushkil kī ik mushkil ye thī 'fitrat'

dil-e-nādāñ ne samjhā ye haram hai jab bhī dair aaya

kai bar un ki mahfil mein hamara zikr-e-KHair aaya

magar izhaar-e-lutf-e-dost-dari ke baghair aaya

samajhta hun ye sang-e-rah ka'ba hai samajhta hun

magar sham aai aur main lauT kar phir su-e-dair aaya

jamal-e-dost se pur-nur hai duniya-e-dil meri

KHayal-e-dost is ghar mein takalluf ke baghair aaya

na Dar girdab-e-gham ka hai na tufan-e-hawadis ka

dil-e-azad in maujon mein lakhon bar tair aaya

jhalakte hain mizha par ashk-e-dil sajde luTata hai

zaban-e-be-kasi par aaj kis ka zikr-e-KHair aaya

rah-e-hasti mein sau mushkil ki ek mushkil ye thi 'fitrat'

dil-e-nadan ne samjha ye haram hai jab bhi dair aaya