kaisa hansta bolta hai har kisi se aadmi

kaisā hañstā boltā hai har kisī se aadmī

jaise kartā ho mohabbat aadmī se aadmī

siikh letā hai agar marnā ḳhushī se aadmī

jhuum uThtā hai ḳhumār-e-zindagī se aadmī

hai ravāñ husn-o-mohabbat kā azal se silsila

aadmī se āshiqī hai āshiqī se aadmī

haiñ junūñ kī raah meñ har gaam par āsāniyāñ

mushkileñ kartā hai paidā āgahī se aadmī

azmateñ jaisī mohabbat karne vāloñ ko milīñ

pā nahīñ saktā kabhī vo be-hisī se aadmī

is kā maqsad hai faqat āsūdgī-e-jān-o-dil

khā kamā saktā nahīñ hai shā.erī se aadmī

maut kā to naam yuuñ hī muft meñ badnām hai

asl meñ Dartā hai 'bismil' zindagī se aadmī

kaisa hansta bolta hai har kisi se aadmi

jaise karta ho mohabbat aadmi se aadmi

sikh leta hai agar marna KHushi se aadmi

jhum uThta hai KHumar-e-zindagi se aadmi

hai rawan husn-o-mohabbat ka azal se silsila

aadmi se aashiqi hai aashiqi se aadmi

hain junun ki rah mein har gam par aasaniyan

mushkilen karta hai paida aagahi se aadmi

azmaten jaisi mohabbat karne walon ko milin

pa nahin sakta kabhi wo be-hisi se aadmi

is ka maqsad hai faqat aasudgi-e-jaan-o-dil

kha kama sakta nahin hai shaeri se aadmi

maut ka to nam yun hi muft mein badnam hai

asl mein Darta hai 'bismil' zindagi se aadmi