kaliyan jahan udas hon gul mein phaban na ho

kaliyāñ jahāñ udaas hoñ gul meñ phaban na ho

yā-rab kahīñ bhī aisī bahār-e-chaman na ho

hote nahīñ haiñ ma.arka-e-ishq sar kabhī

dil meñ agar junūñ na ho sar par kafan na ho

ik din zarūr aa.egī phir rut bahār kī

ḳhush merī bebasī pe ai charḳh-e-kuhan na ho

shahr-e-sitamgarāñ hai ye mumkin nahīñ yahāñ

ahl-e-vafā se zīnat-e-dār-o-rasan na ho

kaise vo qaum hogī bhalā kāmyāb aaj

dīñ-dār jis kā dil na ho dil meñ lagan na ho

be faiz har libās hai ai duḳhtarān-e-qaum

pairāhan-e-hayā hī agar zeb-e-tan na ho

bazm-e-tarab sajā.iye yā ġham kī anjuman

pāmāl bas rivāyat-e-gang-o-jaman na ho

is nasl-e-nau se kaise ho ummīd-e-behtarī

jis kā amal na ḳhuub ho behtar chalan na ho

afkār kī uḌaan meñ aa jaatī hai kamī

qaa.em agar tasalsul-e-mashq-e-suḳhan na ho

'ahsan' na honā gardish-e-hālāt se udaas

hai kaun jis kī ziist meñ ranj-o-mehan na ho

kaliyan jahan udas hon gul mein phaban na ho

ya-rab kahin bhi aisi bahaar-e-chaman na ho

hote nahin hain marka-e-ishq sar kabhi

dil mein agar junun na ho sar par kafan na ho

ek din zarur aaegi phir rut bahaar ki

KHush meri bebasi pe ai charKH-e-kuhan na ho

shahr-e-sitamgaran hai ye mumkin nahin yahan

ahl-e-wafa se zinat-e-dar-o-rasan na ho

kaise wo qaum hogi bhala kaamyab aaj

din-dar jis ka dil na ho dil mein lagan na ho

be faiz har libas hai ai duKHtaran-e-qaum

pairahan-e-haya hi agar zeb-e-tan na ho

bazm-e-tarab sajaiye ya gham ki anjuman

pamal bas riwayat-e-gang-o-jaman na ho

is nasl-e-nau se kaise ho ummid-e-behtari

jis ka amal na KHub ho behtar chalan na ho

afkar ki uDan mein aa jati hai kami

qaem agar tasalsul-e-mashq-e-suKHan na ho

'ahsan' na hona gardish-e-haalat se udas

hai kaun jis ki zist mein ranj-o-mehan na ho