karam-e-fitrat-e-ahbab wahi hai ki jo tha

karam-e-fitrat-e-ahbāb vahī hai ki jo thā

ya.anī hāl-e-dil-e-betāb vahī hai ki jo thā

raunaq-e-shahr mirī āñkhoñ se dekho logo

ek vīrāna pas-e-ḳhvāb vahī hai ki jo thā

bārhā chheḌā hai sāz-e-rag-e-jāñ ko phir bhī

dil se ik rishta-e-mizrāb vahī hai ki jo thā

ashk-e-ulfat ko hiqārat se na dekho ki ye ashk

aaj bhī gauhar-e-nāyāb vahī hai ki jo thā

yuuñ to har tarah masā.il meñ izāfa hai magar

qissa-e-mimbar-o-mehrāb vahī hai ki jo thā

takiya-e-ḳhāk-e-qanā.at hai idhar aur udhar

bistar-e-atlas-o-kamḳhāb vahī hai ki jo thā

laakh taskīn ke sāmān mayassar haiñ 'ziyā'

ālam-e-dīda-e-be-ḳhvāb vahī hai ki jo thā

karam-e-fitrat-e-ahbab wahi hai ki jo tha

yani haal-e-dil-e-betab wahi hai ki jo tha

raunaq-e-shahr meri aankhon se dekho logo

ek virana pas-e-KHwab wahi hai ki jo tha

barha chheDa hai saz-e-rag-e-jaan ko phir bhi

dil se ek rishta-e-mizrab wahi hai ki jo tha

ashk-e-ulfat ko hiqarat se na dekho ki ye ashk

aaj bhi gauhar-e-nayab wahi hai ki jo tha

yun to har tarah masail mein izafa hai magar

qissa-e-mimbar-o-mehrab wahi hai ki jo tha

takiya-e-KHak-e-qanaat hai idhar aur udhar

bistar-e-atlas-o-kamKHab wahi hai ki jo tha

lakh taskin ke saman mayassar hain 'ziya'

aalam-e-dida-e-be-KHwab wahi hai ki jo tha