karb-e-shikastagi ka maza humse puchhiye

karb-e-shikastagī kā maza ham se pūchhiye

ik pal kī dil-lagī kā maza ham se pūchhiye

lamhoñ kī sarḳhushī kā maza aap jāniye

sadiyoñ kī bebasī kā maza ham se pūchhiye

har tīrgī-e-rasm-e-jahālat ko chhoḌ kar

tanvīr-e-āgahī kā maza ham se pūchhiye

manzil kī justujū meñ bhaTakte haiñ aaj tak

be-ilm rahbarī kā maza ham se pūchhiye

shīshe ke sā.ebān meñ hai mom kā badan

sūraj se dostī kā maza ham se pūchhiye

saare havās jal ga.e qurbat kī aañch meñ

is shab kī sho.alagī kā maza ham se pūchhiye

qadmoñ meñ loTne lagī daulat jahān kī

is saada zindagī kā maza ham se pūchhiye

har marhala hayāt kā āsān ho gayā

anjām-e-āshiqī kā maza ham se pūchhiye

aa kar savād-e-kūcha-e-jānāñ meñ ai 'nadīm'

gum hotī raushnī kā maza ham se pūchhiye

karb-e-shikastagi ka maza hum se puchhiye

ek pal ki dil-lagi ka maza hum se puchhiye

lamhon ki sarKHushi ka maza aap jaaniye

sadiyon ki bebasi ka maza hum se puchhiye

har tirgi-e-rasm-e-jahaalat ko chhoD kar

tanwir-e-agahi ka maza hum se puchhiye

manzil ki justuju mein bhaTakte hain aaj tak

be-ilm rahbari ka maza hum se puchhiye

shishe ke saeban mein hai mom ka badan

suraj se dosti ka maza hum se puchhiye

sare hawas jal gae qurbat ki aanch mein

is shab ki shoalagi ka maza hum se puchhiye

qadmon mein loTne lagi daulat jahan ki

is sada zindagi ka maza hum se puchhiye

har marhala hayat ka aasan ho gaya

anjam-e-ashiqi ka maza hum se puchhiye

aa kar sawad-e-kucha-e-jaanan mein ai 'nadim'

gum hoti raushni ka maza hum se puchhiye