kasrat-e-tamasha ko wahdat-ashna paya

kasrat-e-tamāshā ko vahdat-āshnā paayā

hastī-e-fanā meñ bhī jalva-e-baqā paayā

kyā huā ḳhizar ne jo chashma-e-baqā paayā

jiine par mare to kyā jiine kā mazā paayā

jazba-e-nazāra hai aañkh kī ḳhatā kyā hai

ka.abe meñ sanam dekhā dair meñ ḳhudā paayā

ḳhuuñ huā tamanna kā zulm sar-basar dekhā

dil ko imtihāñ meñ bhī sabr-āzmā paayā

ho gayā hai kasrat meñ raaz āshkār us kā

shaan har jagah dekhī jalva jā-ba-jā paayā

dard se huiiñ paidā dil meñ sau tamannā.eñ

zindagī-e-lazzat ko dard-āshnā paayā

parda-dar ḳhamoshī hai be-hijāb āñkheñ haiñ

rāz-e-bazm-e-dushman kā ham ne kuchh patā paayā

husn kī kashish hī meñ rahbarī kī quvvat thī

gumrahān-e-ulfat ne raah kā patā paayā

raaz ho gayā ifshā uTh gayā hijāb āḳhir

aañkh se chhupe to kyā dil meñ zāhirā paayā

yaad aa gayā dil ko phir alast kā paimāñ

phir jabīñ ko ka.aba se sajda-āshnā paayā

ishq kyā kiyā ham ne saḳhtiyāñ sadā jhelīñ

dil ko har musībat meñ jur.at-āzmā paayā

mo.ajiza adab kā hai 'shād' har kalām apnā

nukta-ras tabī.at ne nutq kyā rasā paayā

kasrat-e-tamasha ko wahdat-ashna paya

hasti-e-fana mein bhi jalwa-e-baqa paya

kya hua KHizar ne jo chashma-e-baqa paya

jine par mare to kya jine ka maza paya

jazba-e-nazara hai aankh ki KHata kya hai

kabe mein sanam dekha dair mein KHuda paya

KHun hua tamanna ka zulm sar-basar dekha

dil ko imtihan mein bhi sabr-azma paya

ho gaya hai kasrat mein raaz aashkar us ka

shan har jagah dekhi jalwa ja-ba-ja paya

dard se huin paida dil mein sau tamannaen

zindagi-e-lazzat ko dard-ashna paya

parda-dar KHamoshi hai be-hijab aankhen hain

raaz-e-bazm-e-dushman ka hum ne kuchh pata paya

husn ki kashish hi mein rahbari ki quwwat thi

gumrahan-e-ulfat ne rah ka pata paya

raaz ho gaya ifsha uTh gaya hijab aaKHir

aankh se chhupe to kya dil mein zahira paya

yaad aa gaya dil ko phir alast ka paiman

phir jabin ko kaba se sajda-ashna paya

ishq kya kiya hum ne saKHtiyan sada jhelin

dil ko har musibat mein jurat-azma paya

moajiza adab ka hai 'shad' har kalam apna

nukta-ras tabiat ne nutq kya rasa paya