KHaksari se tu iksir se aage baDh ja

ḳhāksārī se tū iksīr se aage baḌh jā

vo zamīñ ban ki falak-e-pīr se aage baḌh jā

umr bhar jis se giraftār-e-mohabbat na chhuTeñ

zulf-e-jānāñ tū hī zanjīr se aage baḌh jā

dard dekhe jo tujhe dekh ke sar ko paTke

ġham-o-andoh kī tasvīr se aage baḌh jā

ai siyah-baḳhtī tirī ḳhū hai agar baḌhne kī

yaar kī zulf-e-girah-gīr se aage baḌh jā

nāla-e-nīm-shabī ko hai mirī ye tākīd

kaaT meñ burrish-e-shamshīr se aage baḌh jā

mizha-e-yār kā abrū se ishāra hai yahī

tujh meñ tāqat hai agar tiir se aage baḌh jā

tū hī ai āh-e-rasā arsh-e-mua.allā pe pahuñch

tū hī ab nāla-e-shabgīr se aage baḌh jā

paañv pīchhe na haTā manzil-e-maqsūd pakaḌ

jo mile tū usī rahgīr se aage baḌh jā

tujh ko ai gardish-e-kaunain mire sar kī qasam

tū mirī gardish-e-taqdīr se aage baḌh jā

hai nazar-bāz agar kar tū nazāra us kā

yaar ke husn kī tanvīr se aage baḌh jā

zindagī chāhe to ho jā tū azīz-e-har-dil

zā.iqe meñ shakar-o-shīr se aage baḌh jā

KHaksari se tu iksir se aage baDh ja

wo zamin ban ki falak-e-pir se aage baDh ja

umr bhar jis se giraftar-e-mohabbat na chhuTen

zulf-e-jaanan tu hi zanjir se aage baDh ja

dard dekhe jo tujhe dekh ke sar ko paTke

gham-o-andoh ki taswir se aage baDh ja

ai siyah-baKHti teri KHu hai agar baDhne ki

yar ki zulf-e-girah-gir se aage baDh ja

nala-e-nim-shabi ko hai meri ye takid

kaT mein burrish-e-shamshir se aage baDh ja

mizha-e-yar ka abru se ishaara hai yahi

tujh mein taqat hai agar tir se aage baDh ja

tu hi ai aah-e-rasa arsh-e-mualla pe pahunch

tu hi ab nala-e-shabgir se aage baDh ja

panw pichhe na haTa manzil-e-maqsud pakaD

jo mile tu usi rahgir se aage baDh ja

tujh ko ai gardish-e-kaunain mere sar ki qasam

tu meri gardish-e-taqdir se aage baDh ja

hai nazar-baz agar kar tu nazara us ka

yar ke husn ki tanwir se aage baDh ja

zindagi chahe to ho ja tu aziz-e-har-dil

zaiqe mein shakar-o-shir se aage baDh ja