khanakte sikkon ki arthi jahan se guzri hai

khanakte sikkoñ kī arthī jahāñ se guzrī hai

ġharībī kaasa liye phir vahāñ se guzrī hai

hamāre dil kī lagī jab gumāñ se guzrī hai

kabhī zamīñ to kabhī āsmāñ se guzrī hai

abhī to halqa-e-zanjīr paañv meñ hai mire

abhī sadā mirī āh-o-fuġhāñ se guzrī hai

chaḌhā ke aag pe hāñDī meñ bhuuk bachchoñ kī

tasallī maañ kī baḌe imtihāñ se guzrī hai

lakīr khīñch dī nafrat kī do qabīloñ meñ

kabhī jo teġh-e-havas darmiyāñ se guzrī hai

sajā diye ga.e kāñTe diloñ ke āñgan meñ

ta.assubāt kī devī jahāñ se guzrī hai

unheñ milegā bhalā kaise manziloñ kā nishāñ

ki manziloñ kī talab kārvāñ se guzrī hai

rahā 'shajī.a' bhī maañ kī duāoñ kā muhtāj

hayāt jab bhī kisī imtihāñ se guzrī hai

khanakte sikkon ki arthi jahan se guzri hai

gharibi kasa liye phir wahan se guzri hai

hamare dil ki lagi jab guman se guzri hai

kabhi zamin to kabhi aasman se guzri hai

abhi to halqa-e-zanjir panw mein hai mere

abhi sada meri aah-o-fughan se guzri hai

chaDha ke aag pe hanDi mein bhuk bachchon ki

tasalli man ki baDe imtihan se guzri hai

lakir khinch di nafrat ki do qabilon mein

kabhi jo tegh-e-hawas darmiyan se guzri hai

saja diye gae kanTe dilon ke aangan mein

tassubaat ki dewi jahan se guzri hai

unhen milega bhala kaise manzilon ka nishan

ki manzilon ki talab karwan se guzri hai

raha 'shajia' bhi man ki duaon ka muhtaj

hayat jab bhi kisi imtihan se guzri hai