khanDar ki tarh se wo dhire dhire Dhahta tha

khañDar kī tarh se vo dhīre dhīre Dhahtā thā

ye hādisa to zarūrī hai dil na kahtā thā

sameT lo koī kirchī paḌī jo mil jaa.e

vo aks TuuTe hue ā.inoñ meñ rahtā thā

maiñ us galī kā musāfir thā par ḳhabar na huī

ki khiḌkī khiḌkī koī surḳh chāñd gahtā thā

ye kaisī khokhlī chāhat kī dhuul uḌne lagī

tirī ragoñ se to merā hī ḳhuun bahtā thā

jo girtā jism sañbhāle rahā thā ham sab ko

vo shīsha thā jo chaTānoñ kā bojh sahtā thā

maiñ terī qabr kī miTTī bhī nam na kar paayā

tū apne hoñToñ se merā hī dard kahtā thā

tamām shahr 'musavvir' thā ḳhvāb kī bastī

mire hī kānoñ meñ chīḳhoñ kā siisa bahtā thā

khanDar ki tarh se wo dhire dhire Dhahta tha

ye hadisa to zaruri hai dil na kahta tha

sameT lo koi kirchi paDi jo mil jae

wo aks TuTe hue aainon mein rahta tha

main us gali ka musafir tha par KHabar na hui

ki khiDki khiDki koi surKH chand gahta tha

ye kaisi khokhli chahat ki dhul uDne lagi

teri ragon se to mera hi KHun bahta tha

jo girta jism sanbhaale raha tha hum sab ko

wo shisha tha jo chaTanon ka bojh sahta tha

main teri qabr ki miTTi bhi nam na kar paya

tu apne honTon se mera hi dard kahta tha

tamam shahr 'musawwir' tha KHwab ki basti

mere hi kanon mein chiKHon ka sisa bahta tha