KHayal-o-fikr jahan zawiye badalte hain

ḳhayāl-o-fikr jahāñ zāviye badalte haiñ

vahīñ se nit-na.e uslūb chal nikalte haiñ

vo raat ko pa.e gul-gasht jab nikalte haiñ

falak pe chāñd-sitāroñ ke dil machalte haiñ

mire kalām meñ mafrōza-o-qayās nahīñ

ye tajrabāt haiñ jo she'r ban ke Dhalte haiñ

ruḳh-e-hayāt ko har zāviye se dekhā hai

mushāhidāt ke qālib meñ she'r Dhalte haiñ

qadam qadam pe Hayā-soziyon kā aalam hai

sañvar sañvar ke nigārān-e-shahar chalte haiñ

tumhāre ġham se ibārat hai zindagī merī

tumhāre yaad ke dil meñ charāġh chalte haiñ

haiñ kāmrān vahī log aaj duniyā meñ

jo vaqt aur zamāne ke saath chalte haiñ

gudāz-e-qalb bhī hotā hai kuchh unhīñ ko nasīb

jo dard-mand haiñ un ke hī dil pighalte haiñ

rah-e-hayāt meñ aisā bhī hai maqām koī

jahāñ jujūn-o-ḳhirad saath saath chalte haiñ

judā hai rang-e-suḳhan 'tāj' har suḳhan-var kā

ba-e'tebār-e-nazar fikr-o-fan badalte haiñ

KHayal-o-fikr jahan zawiye badalte hain

wahin se nit-nae uslub chal nikalte hain

wo raat ko pae gul-gasht jab nikalte hain

falak pe chand-sitaron ke dil machalte hain

mere kalam mein mafrooza-o-qayas nahin

ye tajrabaat hain jo she'r ban ke Dhalte hain

ruKH-e-hayat ko har zawiye se dekha hai

mushahidat ke qalib mein she'r Dhalte hain

qadam qadam pe Haya-soziyon ka aalam hai

sanwar sanwar ke nigaran-e-shahar chalte hain

tumhaare gham se ibarat hai zindagi meri

tumhaare yaad ke dil mein charagh chalte hain

hain kaamran wahi log aaj duniya mein

jo waqt aur zamane ke sath chalte hain

gudaz-e-qalb bhi hota hai kuchh unhin ko nasib

jo dard-mand hain un ke hi dil pighalte hain

rah-e-hayat mein aisa bhi hai maqam koi

jahan jujun-o-KHirad sath sath chalte hain

juda hai rang-e-suKHan 'taj' har suKHan-war ka

ba-e'tebar-e-nazar fikr-o-fan badalte hain