KHulus-o-mehr se labrez hamdam apna tha

ḳhulūs-o-mehr se labrez hamdam apnā thā

ki beshtar vo hamārā thā kam-kam apnā thā

kiyā jo tajziya niklā na jaane kis kis kā

hamesha jis ko ye samjhā kiye ġham apnā thā

na thā tumhārī mohabbat meñ qā.eda koī

na kārobār-e-vafā hī munazzam apnā thā

rasā.ī kyoñ na huī tā-ba-kū-e-yār agar

niyat ba-ḳhair irāda musammam apnā thā

kisī kī zaat na gumrāh kar sakī ham ko

ki apnī zaat pe īmān mohkam apnā thā

ḳhudā ko jaanā hai insān ko na pahchānā

agarche farz yahī ik muqaddam apnā thā

hamārī saltanat-e-ishq kī hudūd na pūchh

jo raast qad thā ki gesu-e-pur-ḳham apnā thā

kuchh is tarah huī taqsīm bāġh-e-hastī kī

tumhārā ḳhanda-e-gul ashk-e-shabnam apnā thā

vo shaḳhs hī mirī pahchān ban gayā 'shaukat'

kabhī jo dost thā apnā na mahram apnā thā

KHulus-o-mehr se labrez hamdam apna tha

ki beshtar wo hamara tha kam-kam apna tha

kiya jo tajziya nikla na jaane kis kis ka

hamesha jis ko ye samjha kiye gham apna tha

na tha tumhaari mohabbat mein qaeda koi

na karobar-e-wafa hi munazzam apna tha

rasai kyon na hui ta-ba-ku-e-yar agar

niyat ba-KHair irada musammam apna tha

kisi ki zat na gumrah kar saki hum ko

ki apni zat pe iman mohkam apna tha

KHuda ko jaana hai insan ko na pahchana

agarche farz yahi ek muqaddam apna tha

hamari saltanat-e-ishq ki hudud na puchh

jo rast qad tha ki gesu-e-pur-KHam apna tha

kuchh is tarah hui taqsim bagh-e-hasti ki

tumhaara KHanda-e-gul ashk-e-shabnam apna tha

wo shaKHs hi meri pahchan ban gaya 'shaukat'

kabhi jo dost tha apna na mahram apna tha