KHwab-e-KHush kahne hi ko apna tha apna kuchh na tha

ḳhvāb-e-ḳhush kahne hī ko apnā thā apnā kuchh na thā

harf-e-āzādī sunā thā ham ne samjhā kuchh na thā

kaun kahtā hai ki duniyā meñ hamārā kuchh na thā

jab tak apne farz kā ehsās thā kyā kuchh na thā

haath ḳhālī apnī manzil se chalā sū-e-adam

ai musāfir kuchh tire qabze meñ thā yā kuchh na thā

baat kahne kī nahīñ lekin haqīqat hai yahī

merī hastī se jo sab kuchh hai vo tanhā kuchh na thā

un kī ik karvaT pe ho jaatī hai duniyā muztarib

maiñ taḌaptā thā magar merā taḌapnā kuchh na thā

pur-sukūñ thī mere dil kī tarah masjid kī fazā

kitne fitne aaj uThe haiñ kal ye jhagḌā kuchh na thā

dāman-e-daulat thā jab tak dāman-e-aġhyār meñ

aap bhī the ham bhī the ye merā terā kuchh na thā

rahm ke qābil hai us kā ālam-e-bechārgī

kah diyā jis ne bahut kuchh aur sochā kuchh na thā

ham ko kis kis ne na sikhlā.e tarīqe sabr ke

apne uupar vaqt jab aaya tarīqa kuchh na thā

e'tirāf-e-ma.asiyat thī mai-kashī ke saath saath

mai-kade meñ nāz-e-tasbīh-o-musalllā kuchh na thā

sau irāde the amal ke hausle ko kyā kareñ

ab to kahne ke liye un kā irāda kuchh na thā

fitrat-e-insāñ pe jab tak ishq thā partav-fagan

jauhar-e-insāniyat ko 'najm' ḳhatra kuchh na thā

KHwab-e-KHush kahne hi ko apna tha apna kuchh na tha

harf-e-azadi suna tha hum ne samjha kuchh na tha

kaun kahta hai ki duniya mein hamara kuchh na tha

jab tak apne farz ka ehsas tha kya kuchh na tha

hath KHali apni manzil se chala su-e-adam

ai musafir kuchh tere qabze mein tha ya kuchh na tha

baat kahne ki nahin lekin haqiqat hai yahi

meri hasti se jo sab kuchh hai wo tanha kuchh na tha

un ki ek karwaT pe ho jati hai duniya muztarib

main taDapta tha magar mera taDapna kuchh na tha

pur-sukun thi mere dil ki tarah masjid ki faza

kitne fitne aaj uThe hain kal ye jhagDa kuchh na tha

daman-e-daulat tha jab tak daman-e-aghyar mein

aap bhi the hum bhi the ye mera tera kuchh na tha

rahm ke qabil hai us ka aalam-e-bechaargi

kah diya jis ne bahut kuchh aur socha kuchh na tha

hum ko kis kis ne na sikhlae tariqe sabr ke

apne upar waqt jab aaya tariqa kuchh na tha

e'tiraf-e-masiyat thi mai-kashi ke sath sath

mai-kade mein naz-e-tasbih-o-musallla kuchh na tha

sau irade the amal ke hausle ko kya karen

ab to kahne ke liye un ka irada kuchh na tha

fitrat-e-insan pe jab tak ishq tha partaw-fagan

jauhar-e-insaniyat ko 'najm' KHatra kuchh na tha