KHwahishon ko sar pe lade yun safar karne lage

ḳhvāhishoñ ko sar pe laade yuuñ safar karne lage

log apnī zaat ko zer-o-zabar karne lage

is junūñ kā is se behtar aur kyā hogā sila

ham ḳhud apne ḳhuun se dāman ko tar karne lage

dhuup meñ jalte rahe haiñ sarv kī sūrat magar

ye ġhazab hai chāñd par phir bhī nazar karne lage

dostoñ ne tohfatan baḳhshe jo zaḳhmoñ ke gulāb

un kī bū mahsūs ham āThoñ-pahar karne lage

yuuñ badan meñ ḳhuun ko azm-e-safar kā ho junūñ

dil ke dariyā meñ vo phir paidā bhañvar karne lage

reza reza ho na jaa.eñ aks shīshoñ ke kabhī

ab talāsh-e-sañg ḳhud hī shīshagar karne lage

phūl-pattoñ kā unheñ phir hosh kyā baaqī rahe

jin daraḳhtoñ ko havā zer-o-zabar karne lage

zindagī hai bojh gar ḳhud ko badal kuchh is tarah

zindagī tere liye ḳhud hī safar karne lage

baḌh gayā hai is qadar ehsās-e-mahrūmī 'shakeb'

log apnī zaat se kaT kar guzar karne lage

KHwahishon ko sar pe lade yun safar karne lage

log apni zat ko zer-o-zabar karne lage

is junun ka is se behtar aur kya hoga sila

hum KHud apne KHun se daman ko tar karne lage

dhup mein jalte rahe hain sarw ki surat magar

ye ghazab hai chand par phir bhi nazar karne lage

doston ne tohfatan baKHshe jo zaKHmon ke gulab

un ki bu mahsus hum aaThon-pahar karne lage

yun badan mein KHun ko azm-e-safar ka ho junun

dil ke dariya mein wo phir paida bhanwar karne lage

reza reza ho na jaen aks shishon ke kabhi

ab talash-e-sang KHud hi shishagar karne lage

phul-patton ka unhen phir hosh kya baqi rahe

jin daraKHton ko hawa zer-o-zabar karne lage

zindagi hai bojh gar KHud ko badal kuchh is tarah

zindagi tere liye KHud hi safar karne lage

baDh gaya hai is qadar ehsas-e-mahrumi 'shakeb'

log apni zat se kaT kar guzar karne lage