kisi se koi shikwa hai na dil mein koi nafrat hai

kisī se koī shikva hai na dil meñ koī nafrat hai

mile ho tum mujhe jab se ye duniyā ḳhūbsūrat hai

hamārī ban nahīñ saktī kabhī shaiḳh-o-barahman se

gunāh vo jis ko kahte haiñ vahī apnī ibādat hai

kahāñ mauqa milā mujh ko tumhāre saath rahne kā

safar meñ mil ga.e tarzī to ye samjhā sa.ādat hai

guloñ ko ḳhaar kahte haiñ ḳhalish ko shabnamī ThanDak

ishāra aur hī kuchh hai ġhazal kī ye nazākat hai

tumhārī har adā ko jāntā pahchāntā huuñ maiñ

ḳhamoshī hai agar lab par to ye merī sharāfat hai

tumhāre husn-e-roz-afzūñ meñ merā bhī to hissa hai

mirā hissa mujhe de do na doge to ḳhayānat hai

ye kaisī dostī hai dostoñ ko tishna rakhte ho

baḌhī jo tishnagī had se to elān-e-baġhāvat hai

jigar kā ḳhuun hotā hai to phir ash.ār bante haiñ

jigar-sozī-o-ḳhūñ-rezī meñ hī sachchī halāvat hai

tumhāre makr-o-sāzish ne dikhāyā hai mujhe rasta

tire jaur-o-sitam se hī mirī duniyā salāmat hai

jo nikle ḳhuun ke qatre chhalak kar merī āñkhoñ se

ye ḳhud-karda gunāhoñ par bahe ashk-e-nadāmat hai

tū apnī qadr kar nādāñ tujhe naa.eb banāyā hai

tirī qismat meñ duniyā kī qayādat aur imāmat hai

sunāte haiñ miyāñ 'mahmūd' ab to āp-bītī hī

ba-zāhir dāstān-e-ġham ba-bātin ik hikāyat hai

kisi se koi shikwa hai na dil mein koi nafrat hai

mile ho tum mujhe jab se ye duniya KHubsurat hai

hamari ban nahin sakti kabhi shaiKH-o-barahman se

gunah wo jis ko kahte hain wahi apni ibaadat hai

kahan mauqa mila mujh ko tumhaare sath rahne ka

safar mein mil gae tarzi to ye samjha saadat hai

gulon ko KHar kahte hain KHalish ko shabnami ThanDak

ishaara aur hi kuchh hai ghazal ki ye nazakat hai

tumhaari har ada ko jaanta pahchanta hun main

KHamoshi hai agar lab par to ye meri sharafat hai

tumhaare husn-e-roz-afzun mein mera bhi to hissa hai

mera hissa mujhe de do na doge to KHayanat hai

ye kaisi dosti hai doston ko tishna rakhte ho

baDhi jo tishnagi had se to elan-e-baghawat hai

jigar ka KHun hota hai to phir ashaar bante hain

jigar-sozi-o-KHun-rezi mein hi sachchi halawat hai

tumhaare makr-o-sazish ne dikhaya hai mujhe rasta

tere jaur-o-sitam se hi meri duniya salamat hai

jo nikle KHun ke qatre chhalak kar meri aankhon se

ye KHud-karda gunahon par bahe ashk-e-nadamat hai

tu apni qadr kar nadan tujhe naeb banaya hai

teri qismat mein duniya ki qayaadat aur imamat hai

sunate hain miyan 'mahmud' ab to aap-biti hi

ba-zahir dastan-e-gham ba-baatin ek hikayat hai