kisi surat junun ki fitna-samani nahin jati

kisī sūrat junūñ kī fitna-sāmānī nahīñ jaatī

bahār aatī hai lekin ḳhāna-vīrānī nahīñ jaatī

vo yuuñ altāf karte haiñ ki jaise baaġh se aksar

ḳhizāñ mādūm ho jaatī hai vīrānī nahīñ jaatī

vo aate haiñ magar merā taḌapnā kam nahīñ hotā

vo milte haiñ magar merī pareshānī nahīñ jaatī

vo yuuñ aate haiñ jaise ghar kī sūrat tak nahīñ būjhī

vo yuuñ milte haiñ goyā shakl pahchānī nahīñ jaatī

shabāb aayā to aa.ī ġhairiyat bhī un ke hisse meñ

ki pahchānī huī sūrat bhī pahchānī nahīñ jaatī

vahī isrār-e-tiflāna ki dekheñ dard-e-dil ham bhī

javāñ hone ko aa.e aur nādānī nahīñ jaatī

hayāt-e-jadval-e-bar-āb meñ kyā rañj kyā rāhat

magar is āgahī par bhī pareshānī nahīñ jaatī

yaqīnan aap aa.e haiñ yaqīnan aap hī vo haiñ

magar māyūsī-e-paiham ko hairānī nahīñ jaatī

bhalā ab kaun hai pursān-e-arbāb-e-suḳhan 'bismil'

magar phir aap kī ḳhū-e-ġhazal-ḳhvānī nahīñ jaatī

mohabbat kā karishma yuuñ bhī dekhā hai kabhī 'bismil'

ki dariyā ḳhushk ho jaatā hai tuġhyānī nahīñ jaatī

kisi surat junun ki fitna-samani nahin jati

bahaar aati hai lekin KHana-virani nahin jati

wo yun altaf karte hain ki jaise bagh se aksar

KHizan madum ho jati hai virani nahin jati

wo aate hain magar mera taDapna kam nahin hota

wo milte hain magar meri pareshani nahin jati

wo yun aate hain jaise ghar ki surat tak nahin bujhi

wo yun milte hain goya shakl pahchani nahin jati

shabab aaya to aai ghairiyat bhi un ke hisse mein

ki pahchani hui surat bhi pahchani nahin jati

wahi israr-e-tiflana ki dekhen dard-e-dil hum bhi

jawan hone ko aae aur nadani nahin jati

hayat-e-jadwal-e-bar-ab mein kya ranj kya rahat

magar is aagahi par bhi pareshani nahin jati

yaqinan aap aae hain yaqinan aap hi wo hain

magar mayusi-e-paiham ko hairani nahin jati

bhala ab kaun hai pursan-e-arbab-e-suKHan 'bismil'

magar phir aap ki KHu-e-ghazal-KHwani nahin jati

mohabbat ka karishma yun bhi dekha hai kabhi 'bismil'

ki dariya KHushk ho jata hai tughyani nahin jati