kitab-e-zindagi ka har warq kahne ko sada hai

kitāb-e-zindagī kā har varq kahne ko saada hai

magar jo kuchh bhī likkhā hai hurūf-e-ḳhūñ meñ likkhā hai

ye saarī shān-o-shaukat kuchh nahīñ nazroñ kā dhokā hai

asāsa āshiyāne kā jise kahte ho tinkā hai

lahū de kar jo sīñchā thā gulistān-e-vafā ham ne

guloñ ke jism se vo rang ban kar phuuT niklā hai

ye merī ḳhush-nasībī hai ki us but ne ba-dast-e-ḳhud

sar-e-fihrist dīvānoñ meñ merā naam likkhā hai

havā.eñ DhūñDhtī phirtī haiñ us mard-e-mujāhid ko

farāz-e-dār par jis ne charāġh-e-zīst rakkhā hai

yaqīnan zaḳhm-e-dil ke saare Tāñke TuuT jā.eñge

tirī nazroñ kā jaadū dil pe sho.ala ban ke lapkā hai

kabhī shahr-e-tamannā meñ to aa kar dekh jaate vo

dar-o-dīvār par har samt kis kā naam likkhā hai

sitam kā aur mauqa' us ko mil jā.egā ai 'hairat'

isī bā'is vo jiine kī du'ā.eñ mujh ko detā hai

kitab-e-zindagi ka har warq kahne ko sada hai

magar jo kuchh bhi likkha hai huruf-e-KHun mein likkha hai

ye sari shan-o-shaukat kuchh nahin nazron ka dhoka hai

asasa aashiyane ka jise kahte ho tinka hai

lahu de kar jo sincha tha gulistan-e-wafa hum ne

gulon ke jism se wo rang ban kar phuT nikla hai

ye meri KHush-nasibi hai ki us but ne ba-dast-e-KHud

sar-e-fihrist diwanon mein mera nam likkha hai

hawaen DhunDhti phirti hain us mard-e-mujahid ko

faraaz-e-dar par jis ne charagh-e-zist rakkha hai

yaqinan zaKHm-e-dil ke sare Tanke TuT jaenge

teri nazron ka jadu dil pe shoala ban ke lapka hai

kabhi shahr-e-tamanna mein to aa kar dekh jate wo

dar-o-diwar par har samt kis ka nam likkha hai

sitam ka aur mauqa' us ko mil jaega ai 'hairat'

isi ba'is wo jine ki du'aen mujh ko deta hai