koi bhi lamha ho ek aag laga jati hai

koī bhī lamha ho ik aag lagā jaatī hai

yād-e-māzī hai ki rang apnā dikhā jaatī hai

dil meñ ummīd kī dīvār uThe yā na uThe

āgahī dard kī dahlīz banā jaatī hai

jaane vo kaun sī ik lahr chhupī hai dil meñ

sāz-dar-sāz ka.ī giit sunā jaatī hai

ġham ke zindāñ meñ dar aatā hai jo sannāTā kabhī

aarzū chupke se zanjīr hilā jaatī hai

ham kahāñ uThte haiñ ehsās kī dastak pe bhalā

vo to kahiye koī āvāz lagā jaatī hai

jab kabhī raat chhupātī hai badan kī shikneñ

raushnī baḌh ke har ik raaz batā jaatī hai

thak ke so jaatī haiñ jab soch kī kirneñ 'at.har'

koī lai baḌh ke lahū apnā jalā jaatī hai

koi bhi lamha ho ek aag laga jati hai

yaad-e-mazi hai ki rang apna dikha jati hai

dil mein ummid ki diwar uThe ya na uThe

aagahi dard ki dahliz bana jati hai

jaane wo kaun si ek lahr chhupi hai dil mein

saz-dar-saz kai git suna jati hai

gham ke zindan mein dar aata hai jo sannaTa kabhi

aarzu chupke se zanjir hila jati hai

hum kahan uThte hain ehsas ki dastak pe bhala

wo to kahiye koi aawaz laga jati hai

jab kabhi raat chhupati hai badan ki shiknen

raushni baDh ke har ek raaz bata jati hai

thak ke so jati hain jab soch ki kirnen 'athar'

koi lai baDh ke lahu apna jala jati hai