kuchh aise mahw hon aankhen jo khol kar dekhen

kuchh aise mahv hoñ āñkheñ jo khol kar dekheñ

usī kā jalva nazar aa.e ham jidhar dekheñ

dam-e-aḳhīr koī aarzū nahīñ dil meñ

ye aarzū hai ki ham tujh ko ik nazar dekheñ

unheñ banāo se fursat kahāñ shab-e-va.ada

fuzūl shaam se kyoñ raah tā-sahar dekheñ

riyāz dahr meñ phūle samā.eñ ham kyūñkar

jo apne naḳhl-e-tamannā ko bārvar dekheñ

idhar hai merā jigar aur udhar hai dil merā

vo kashmakash meñ paḌe haiñ kidhar kidhar dekheñ

nisār chashm-e-ināyat pe ham hoñ so dil se

vo is nazar se agar ham ko ik nazar dekheñ

ḳhabar milī hai mujhe aaj un ke aane kī

jo ahl-e-ishq hoñ vo aah kā asar dekheñ

jo kuchh ho dil meñ hamāre uThā na rakkheñ ham

jo kuchh ho aap ke dil meñ vo aap kar dekheñ

nahīñ pasand mujhe nukta-chīniyāñ 'hāmid'

kisī ke aib ko kyā dekheñ ham hunar dekheñ

kuchh aise mahw hon aankhen jo khol kar dekhen

usi ka jalwa nazar aae hum jidhar dekhen

dam-e-aKHir koi aarzu nahin dil mein

ye aarzu hai ki hum tujh ko ek nazar dekhen

unhen banao se fursat kahan shab-e-wada

fuzul sham se kyon rah ta-sahar dekhen

riyaz dahr mein phule samaen hum kyunkar

jo apne naKHl-e-tamanna ko barwar dekhen

idhar hai mera jigar aur udhar hai dil mera

wo kashmakash mein paDe hain kidhar kidhar dekhen

nisar chashm-e-inayat pe hum hon so dil se

wo is nazar se agar hum ko ek nazar dekhen

KHabar mili hai mujhe aaj un ke aane ki

jo ahl-e-ishq hon wo aah ka asar dekhen

jo kuchh ho dil mein hamare uTha na rakkhen hum

jo kuchh ho aap ke dil mein wo aap kar dekhen

nahin pasand mujhe nukta-chiniyan 'hamid'

kisi ke aib ko kya dekhen hum hunar dekhen