kya ho gai wo bazm-e-tarab hum nahin kahte

kyā ho ga.ī vo bazm-e-tarab ham nahīñ kahte

kis kā hai alam shab-hama-shab ham nahīñ kahte

yāroñ ko hai jis tarz-e-taḳhātub se shikāyat

is tarz-e-taḳhātub kā sabab ham nahīñ kahte

kahne kā ye mauqa' hai na sunñe kā mahal hai

ab aap hī kah lījiye ab ham nahīñ kahte

be-mā'nī-o-mafhūm bhī jiite haiñ bahut log

kyoñ jiite haiñ jiine kā sabab ham nahīñ kahte

is daur kī har baat nirālī sahī lekin

ye daur bhī hai daur-e-'ajab ham nahīñ kahte

logoñ ko hamārī yahī pahchān bahut hai

logoñ se kabhī nām-o-nasab ham nahīñ kahte

ye den ḳhudā kī hai ḳhudā jis ko navāze

miltā hai kahāñ 'ilm-o-adab ham nahīñ kahte

maddham ho ki raushan tire iz.hār meñ 'vasfī'

hai bhī ki nahīñ hai tirī chhab ham nahīñ kahte

kya ho gai wo bazm-e-tarab hum nahin kahte

kis ka hai alam shab-hama-shab hum nahin kahte

yaron ko hai jis tarz-e-taKHatub se shikayat

is tarz-e-taKHatub ka sabab hum nahin kahte

kahne ka ye mauqa' hai na sunne ka mahal hai

ab aap hi kah lijiye ab hum nahin kahte

be-ma'ni-o-mafhum bhi jite hain bahut log

kyon jite hain jine ka sabab hum nahin kahte

is daur ki har baat nirali sahi lekin

ye daur bhi hai daur-e-'ajab hum nahin kahte

logon ko hamari yahi pahchan bahut hai

logon se kabhi nam-o-nasab hum nahin kahte

ye den KHuda ki hai KHuda jis ko nawaze

milta hai kahan 'ilm-o-adab hum nahin kahte

maddham ho ki raushan tere izhaar mein 'wasfi'

hai bhi ki nahin hai teri chhab hum nahin kahte