kya ta-ba-zaban aae dil-e-zar ki aawaz

kyā tā-ba-zabāñ aa.e dil-e-zār kī āvāz

bīmār ke mānind hai bīmār kī āvāz

muusā kī pasand aa.ī hai takrār kī āvāz

matlūb huī tālib-e-dīdār kī āvāz

duunī na ho kyoñ āmad-e-dildār kī āvāz

ḳhalḳhāl kī āvāz hai raftār kī āvāz

kahte haiñ vo sun sun ke dil-e-zār kī āvāz

aatī hai ye shāyad mire bīmār kī āvāz

itnā gul-e-gulshan ke liye shor machāyā

paḌ paḌ ga.ī murġhān-e-giraftār kī āvāz

ab haal ye hai zo.af-o-naqāhat se masīhā

aatī nahīñ lab tak tire bīmār kī āvāz

surme kā asar baḳht-e-siyah rakhtā hai us kā

ho band na kyoñ murġh-e-giraftār kī āvāz

jab abrū-e-ḳhamdār kā hotā hai tasavvur

aatī hai mire kaan meñ talvār kī āvāz

sayyād qafas ko to zarā dekh le jākar

aatī nahīñ kyoñ bulbul-e-gulzār kī āvāz

kyā jaane huā kyā dil-e-behāl ko mere

aatī nahīñ mujh tak mire bīmār kī āvāz

hai shor yam-e-ashk kā jis tarah jahāñ meñ

us tarah nahīñ qulzum-o-zaḳhḳhār kī āvāz

iflās ne gherā hai faqīroñ ko ye tere

kānoñ meñ bhī aatī nahīñ dīnār kī āvāz

kushta kiyā ik baar sadā mujh ko sunā ke

qātil hai mire zālim-e-ḳhuñḳhār kī āvāz

lahrātī huī aap ye aatī hai laboñ tak

kyā mast hai saaqī tire mai-ḳhvār kī āvāz

ushshāq kā sun sun ke jigar hotā hai TukḌe

talvār hai ḳhud bhī tirī talvār kī āvāz

kartā maiñ sadā zer-e-mahal misl-e-gadā kyā

suntā nahīñ koī pas-e-dīvār kī āvāz

be-sāḳhta āñkhoñ se nikal aate haiñ aañsū

sunte haiñ agar āshiq-e-bīmār kī āvāz

dil toḌ diyā nāvak-e-mizhgāñ ne hamārā

tā-gosh na aa.e lab-e-sofār kī āvāz

das biis jagah baiTh ke aatī hai laboñ tak

bīmār hai iisā tire bīmār kī āvāz

āñkhoñ ko dikhā qabr meñ yā-rab ruḳh-e-anvar

kānoñ ko sunā haidar-e-karrār kī āvāz

hil jaatā hai nāloñ se dil-e-zār hamārā

suntā huuñ jo 'fāḳhir' kisī bīmār kī āvāz

kya ta-ba-zaban aae dil-e-zar ki aawaz

bimar ke manind hai bimar ki aawaz

musa ki pasand aai hai takrar ki aawaz

matlub hui talib-e-didar ki aawaz

duni na ho kyon aamad-e-dildar ki aawaz

KHalKHal ki aawaz hai raftar ki aawaz

kahte hain wo sun sun ke dil-e-zar ki aawaz

aati hai ye shayad mere bimar ki aawaz

itna gul-e-gulshan ke liye shor machaya

paD paD gai murghan-e-giraftar ki aawaz

ab haal ye hai zoaf-o-naqahat se masiha

aati nahin lab tak tere bimar ki aawaz

surme ka asar baKHt-e-siyah rakhta hai us ka

ho band na kyon murgh-e-giraftar ki aawaz

jab abru-e-KHamdar ka hota hai tasawwur

aati hai mere kan mein talwar ki aawaz

sayyaad qafas ko to zara dekh le jakar

aati nahin kyon bulbul-e-gulzar ki aawaz

kya jaane hua kya dil-e-behaal ko mere

aati nahin mujh tak mere bimar ki aawaz

hai shor yam-e-ashk ka jis tarah jahan mein

us tarah nahin qulzum-o-zaKHKHar ki aawaz

iflas ne ghera hai faqiron ko ye tere

kanon mein bhi aati nahin dinar ki aawaz

kushta kiya ek bar sada mujh ko suna ke

qatil hai mere zalim-e-KHunKHar ki aawaz

lahraati hui aap ye aati hai labon tak

kya mast hai saqi tere mai-KHwar ki aawaz

ushshaq ka sun sun ke jigar hota hai TukDe

talwar hai KHud bhi teri talwar ki aawaz

karta main sada zer-e-mahal misl-e-gada kya

sunta nahin koi pas-e-diwar ki aawaz

be-saKHta aankhon se nikal aate hain aansu

sunte hain agar aashiq-e-bimar ki aawaz

dil toD diya nawak-e-mizhgan ne hamara

ta-gosh na aae lab-e-sofar ki aawaz

das bis jagah baiTh ke aati hai labon tak

bimar hai isa tere bimar ki aawaz

aankhon ko dikha qabr mein ya-rab ruKH-e-anwar

kanon ko suna haidar-e-karrar ki aawaz

hil jata hai nalon se dil-e-zar hamara

sunta hun jo 'faKHir' kisi bimar ki aawaz