lakh bahlaen kisi tarah bahalta hi nahin

laakh bahlā.eñ kisī tarah bahaltā hī nahīñ

dil bhī lamhoñ kī tarah hai ki Thahartā hī nahīñ

ab ke mausam pe to jaadū koī chaltā hī nahīñ

abr uThtā hai magar khul ke barastā hī nahīñ

koī ḳhushbū na koī us kī kasak hai is meñ

us ke patthar se mire zaḳhm kā rishta hī nahīñ

jitnā suljhāte haiñ utnā hī ulajh jaatā hai

mas.ala ziist kā ab mujh se sulajhtā hī nahīñ

āñdhiyoñ kā karam-e-ḳhās rahā hai mujh par

ab koī sho.ala nasheman pe lapaktā hī nahīñ

maiñ bhī bik jaatā kabhī misr kī ḳhātūn ke haath

qāfila koī idhar ho ke nikaltā hī nahīñ

chup hai ab vo mire hālāt ke pas-manzar meñ

ab mire sar koī ilzām vo dhartā hī nahīñ

jis meñ ḳhud-bīnī ḳhud-ārā.ī-o-ḳhuddārī hai

maslahat ke kisī sāñche meñ vo Dhaltā hī nahīñ

ye haqīqat hai tire tark-e-ta.alluq kī qasam

ḳhaar ab koī mire dil meñ khaTaktā hī nahīñ

jaane kis manzil-e-mauhūm pe aa pahuñche haiñ

rāsta koī hamārā yahāñ taktā hī nahīñ

kitne mansūr haiñ kahne ko anal-haq kah deñ

daar kī samt magar ruḳh koī kartā hī nahīñ

tīr-o-talvār kā har zaḳhm sañvar saktā hai

baat kā zaḳhm kisī haal meñ bhartā hī nahīñ

ye mohabbat kā samundar vo samundar hai 'zuhūr'

Dūbne vaalā kisī vaqt ubhartā hī nahīñ

lakh bahlaen kisi tarah bahalta hi nahin

dil bhi lamhon ki tarah hai ki Thaharta hi nahin

ab ke mausam pe to jadu koi chalta hi nahin

abr uThta hai magar khul ke barasta hi nahin

koi KHushbu na koi us ki kasak hai is mein

us ke patthar se mere zaKHm ka rishta hi nahin

jitna suljhate hain utna hi ulajh jata hai

masala zist ka ab mujh se sulajhta hi nahin

aandhiyon ka karam-e-KHas raha hai mujh par

ab koi shoala nasheman pe lapakta hi nahin

main bhi bik jata kabhi misr ki KHatun ke hath

qafila koi idhar ho ke nikalta hi nahin

chup hai ab wo mere haalat ke pas-manzar mein

ab mere sar koi ilzam wo dharta hi nahin

jis mein KHud-bini KHud-arai-o-KHuddari hai

maslahat ke kisi sanche mein wo Dhalta hi nahin

ye haqiqat hai tere tark-e-talluq ki qasam

KHar ab koi mere dil mein khaTakta hi nahin

jaane kis manzil-e-mauhum pe aa pahunche hain

rasta koi hamara yahan takta hi nahin

kitne mansur hain kahne ko anal-haq kah den

dar ki samt magar ruKH koi karta hi nahin

tir-o-talwar ka har zaKHm sanwar sakta hai

baat ka zaKHm kisi haal mein bharta hi nahin

ye mohabbat ka samundar wo samundar hai 'zuhur'

Dubne wala kisi waqt ubharta hi nahin