lab par KHamoshiyon ko sajae nazar churae

lab par ḳhamoshiyoñ ko sajā.e nazar churā.e

jo ahl-e-dil meñ baiThe haiñ chup-chāp sar jhukā.e

kah do koī sabā se idhar āj-kal na aa.e

kaliyāñ kahīñ mahak na uTheñ phuul khil na jaa.e

ab dostī vo fan ki jo sīkhe vahī nibhā.e

aur hai vafā tamāshā jise aa.e vo dikhā.e

kuchh kahnā jurm hai to ḳhatā-vār maiñ bhī huuñ

ye aur baat merā kahā vo samajh na paa.e

lab par KHamoshiyon ko sajae nazar churae

jo ahl-e-dil mein baiThe hain chup-chap sar jhukae

kah do koi saba se idhar aaj-kal na aae

kaliyan kahin mahak na uThen phul khil na jae

ab dosti wo fan ki jo sikhe wahi nibhae

aur hai wafa tamasha jise aae wo dikhae

kuchh kahna jurm hai to KHata-war main bhi hun

ye aur baat mera kaha wo samajh na pae