lafzon mein inqalab ki tahrir qaid hai

lafzoñ meñ inqalāb kī tahrīr qaid hai

zehnoñ meñ zulm-o-jaur kī tasvīr qaid hai

kaise milegī talḳhī-e-ayyām se najāt

ab to hisār-e-zahr meñ iksīr qaid hai

baḌhtī hī jā rahī hai sitam-parvarī kī aag

āḳhir kahāñ duāoñ kī tāsīr qaid hai

hindostāñ hai dast-e-siyāsat meñ is tarah

jis tarah said-gāh meñ naḳhchīr qaid hai

barfīlī vādiyoñ meñ jahannum kā raqs hai

sho.aloñ meñ aaj jannat-e-kashmīr qaid hai

phūloñ kī bebasī kā kahāñ tak ho tazkira

kāñToñ meñ jab bahār kī tafsīr qaid hai

taqdīr kohkan pe lagātī hai qahqaha

dasht-e-anā meñ tesha-e-tadbīr qaid hai

in ūñchī chimniyoñ se nikalte dhueñ ke biich

mehnat-kashoñ ke ḳhvāb kī ta.abīr qaid hai

hai zindagī ġhanīm kī us vaqt tak 'nadīm'

jab tak mirī niyām meñ shamshīr qaid hai

lafzon mein inqalab ki tahrir qaid hai

zehnon mein zulm-o-jaur ki taswir qaid hai

kaise milegi talKHi-e-ayyam se najat

ab to hisar-e-zahr mein iksir qaid hai

baDhti hi ja rahi hai sitam-parwari ki aag

aaKHir kahan duaon ki tasir qaid hai

hindostan hai dast-e-siyasat mein is tarah

jis tarah said-gah mein naKHchir qaid hai

barfili wadiyon mein jahannum ka raqs hai

shoalon mein aaj jannat-e-kashmir qaid hai

phulon ki bebasi ka kahan tak ho tazkira

kanTon mein jab bahaar ki tafsir qaid hai

taqdir kohkan pe lagati hai qahqaha

dasht-e-ana mein tesha-e-tadbir qaid hai

in unchi chimniyon se nikalte dhuen ke bich

mehnat-kashon ke KHwab ki tabir qaid hai

hai zindagi ghanim ki us waqt tak 'nadim'

jab tak meri niyam mein shamshir qaid hai