maal-e-hasil-e-gham ko gham-e-hasil samajhte hain

ma.āl-e-hāsil-e-ġham ko ġham-e-hāsil samajhte haiñ

fareb-e-jāda-e-manzil ko ham manzil samajhte haiñ

kabhī giryāñ-kunāñ hotī hai jab manzar kī betābi

ham us be-manzarī ko diid ke qābil samajhte haiñ

samajh saktī nahīñ ye chashm-e-nargis par ġhanīmat hai

chaman vaale hamārā 'uqda-e-mushkil samajhte haiñ

hameñ to dast-e-qātil bhī lage dast-e-masīhā sā

sitam-parvar haiñ jo qātil ko bhī qātil samajhte haiñ

haqīqat vā'izān-e-shahr kī khul hī ga.ī nāseh

adhūre haiñ jo ḳhud apne ta.iiñ kāmil samajhte haiñ

qafas ko le uḌī hai jumbish-e-par tā.ir-e-jāñ kī

ye bāteñ sāhibān-e-jazba-e-kāmil samajhte haiñ

abhī tak maslahat-bīnī ke jo zer-e-tasallut haiñ

fusūñ-ārā siyāsat meñ hameñ shāmil samajhte haiñ

suno ham kushtagāñ kī sākinān-e-shahr-e-ḳhvāb-āvar

tumhāre haal se vāqif haiñ mustaqbil samajhte haiñ

fanā ho sham'-e-nāmūs-e-vafā par baḌh ke parvāne

yahī hai kār-e-āsāñ sab jise mushkil samajhte haiñ

nazar se pī le jo durd-e-tah-e-jām-e-mohabbat ko

ham us mahfil-nashīñ ko sāhib-e-mahfil samajhte haiñ

masalte haiñ rag-e-ehsās ko pairoñ tale paiham

vo sang-e-rahguzar ko bhī hamārā dil samajhte haiñ

'muzaffar' kis ko andāza hai un kī tez-gāmī kā

jo sang-e-mīl ko gard-e-rah-e-manzil samajhte haiñ

maal-e-hasil-e-gham ko gham-e-hasil samajhte hain

fareb-e-jada-e-manzil ko hum manzil samajhte hain

kabhi giryan-kunan hoti hai jab manzar ki betabi

hum us be-manzari ko did ke qabil samajhte hain

samajh sakti nahin ye chashm-e-nargis par ghanimat hai

chaman wale hamara 'uqda-e-mushkil samajhte hain

hamein to dast-e-qatil bhi lage dast-e-masiha sa

sitam-parwar hain jo qatil ko bhi qatil samajhte hain

haqiqat wa'izan-e-shahr ki khul hi gai naseh

adhure hain jo KHud apne tain kaamil samajhte hain

qafas ko le uDi hai jumbish-e-par tair-e-jaan ki

ye baaten sahiban-e-jazba-e-kaamil samajhte hain

abhi tak maslahat-bini ke jo zer-e-tasallut hain

fusun-ara siyasat mein hamein shamil samajhte hain

suno hum kushtagan ki sakinan-e-shahr-e-KHwab-awar

tumhaare haal se waqif hain mustaqbil samajhte hain

fana ho sham'-e-namus-e-wafa par baDh ke parwane

yahi hai kar-e-asan sab jise mushkil samajhte hain

nazar se pi le jo durd-e-tah-e-jam-e-mohabbat ko

hum us mahfil-nashin ko sahib-e-mahfil samajhte hain

masalte hain rag-e-ehsas ko pairon tale paiham

wo sang-e-rahguzar ko bhi hamara dil samajhte hain

'muzaffar' kis ko andaza hai un ki tez-gami ka

jo sang-e-mil ko gard-e-rah-e-manzil samajhte hain