main badalte mausamon ke rang se bezar hun

maiñ badalte mausamoñ ke rañg se bezār huuñ

har na.ī rut se chaman meñ barsar-e-paikār huuñ

husn-e-yūsuf ke ḳharīdāro baḌho merī taraf

maiñ adab ke dā.ere meñ misr kā bāzār huuñ

vaqt ke hāthoñ bigaḌtā huuñ sañvarne ke liye

maiñ samundar ke kināre ret kī dīvār huuñ

kaun sā hai marhala jo mujh se tai paatā nahīñ

maiñ ḳhud apne rāste kī manzil-e-dushvār huuñ

jis ko paḌhnā hai mujhe vo pahlī fursat meñ paḌhe

sub.h ke hāthoñ meñ pichhlī raat kā aḳhbār huuñ

ḳhvāb hai mere liye mauj-e-havā kī tāzgī

maiñ shajar par zard patte kī tarah bedār huuñ

merī gardan par 'sabā' hai apnī shohrat kā lahū

maiñ amal kī raushnī meñ jurm kā iqrār huuñ

main badalte mausamon ke rang se bezar hun

har nai rut se chaman mein barsar-e-paikar hun

husn-e-yusuf ke KHaridaro baDho meri taraf

main adab ke daere mein misr ka bazar hun

waqt ke hathon bigaDta hun sanwarne ke liye

main samundar ke kinare ret ki diwar hun

kaun sa hai marhala jo mujh se tai pata nahin

main KHud apne raste ki manzil-e-dushwar hun

jis ko paDhna hai mujhe wo pahli fursat mein paDhe

subh ke hathon mein pichhli raat ka aKHbar hun

KHwab hai mere liye mauj-e-hawa ki tazgi

main shajar par zard patte ki tarah bedar hun

meri gardan par 'saba' hai apni shohrat ka lahu

main amal ki raushni mein jurm ka iqrar hun