matlub-e-dil na kyon nigah-e-tund-e-yar ho

matlūb-e-dil na kyoñ nigah-e-tund-e-yār ho

aisā to tiir ho jo kaleje ke paar ho

bād-e-fanā jo qabr meñ dil be-qarār ho

shaq jā-ba-jā se saqf-o-zamīn-e-mazār ho

tīr-e-nigāh-e-shauq jo siine ke paar ho

ho pāsh-pāsh dil to kaleja figār ho

sāya-figan jo qabr pe abr-e-bahār ho

mujh par nuzūl rahmat-e-parvardigār ho

pahlū se apne pheñk duuñ tujh ko nikāl ke

ai dil jo imtihān pe tū be-qarār ho

raushan na kyoñ ho dāġh-e-jigar merā qabr meñ

koī to tīrgī meñ charāġh-e-mazār ho

jalva-fagan jo aap hoñ marqad meñ yā-alī

shām-e-mazār ye mirī sub.h-e-mazār ho

ho jā.ūñ nājiyoñ hī meñ yā āsiyoñ hī meñ

yā-rab mirā kisī na kisī meñ shumār ho

madd-e-nazar mujhe hai tirā imtihān aaj

ai tīr-e-āh gumbad-e-gardūñ ke paar ho

kahte haiñ DhūñDh DhūñDh ke vo merī qabr ko

yuuñ be-nishāñ kisī kā na yā-rab mazār ho

malte ho qabr par kaf-e-afsos kis liye

manzūr hai tumheñ ki dobāra fishār ho

ḳhuld-o-saqar meñ ahl-e-qayāmat chale ga.e

mujh ko bhī hukm kuchh mire parvardigār ho

bijlī girī kabhī kabhī bārish lahad pe ho

ḳhandāñ koī ho aur koī ashk-bār ho

gesū karo jo aa ke pareshāñ sar-e-lahad

phir kyoñ na zer-e-qabr mujhe intishār ho

tum taḌpo misl-e-mauj maiñ taḌpūñ misāl-e-barq

tum ko na ho qarār na mujh ko qarār ho

ai sham.a mujh ġharīb kā baaqī koī nahīñ

tū hī zarā lahad pe mire ashk-bār ho

tīr-e-nigāh aap kā itnā to ho bhalā

dil toḌ kar baḌhe to kaleje ke paar ho

suntā huuñ baad marg ke hotī hai dīd-e-dost

de duuñ maiñ apnī jaan agar iḳhtiyār ho

pahlū se dil nikāl ke le jā.iyegā ba.ad

pahle hamāre aap ke qaul-o-qarār ho

turfa hai ye nasheb-o-farāz-e-tarīq-e-ishq

paidal jilau meñ qais ho lailā savār ho

jaatī haiñ gar buland tirī nāvak-e-ḳhayāl

'fāḳhir' falak pe tā.ir-e-mazmūñ shikār ho

matlub-e-dil na kyon nigah-e-tund-e-yar ho

aisa to tir ho jo kaleje ke par ho

baad-e-fana jo qabr mein dil be-qarar ho

shaq ja-ba-ja se saqf-o-zamin-e-mazar ho

tir-e-nigah-e-shauq jo sine ke par ho

ho pash-pash dil to kaleja figar ho

saya-figan jo qabr pe abr-e-bahaar ho

mujh par nuzul rahmat-e-parwardigar ho

pahlu se apne phenk dun tujh ko nikal ke

ai dil jo imtihan pe tu be-qarar ho

raushan na kyon ho dagh-e-jigar mera qabr mein

koi to tirgi mein charagh-e-mazar ho

jalwa-fagan jo aap hon marqad mein ya-ali

sham-e-mazar ye meri subh-e-mazar ho

ho jaun najiyon hi mein ya aasiyon hi mein

ya-rab mera kisi na kisi mein shumar ho

madd-e-nazar mujhe hai tera imtihan aaj

ai tir-e-ah gumbad-e-gardun ke par ho

kahte hain DhunDh DhunDh ke wo meri qabr ko

yun be-nishan kisi ka na ya-rab mazar ho

malte ho qabr par kaf-e-afsos kis liye

manzur hai tumhein ki dobara fishaar ho

KHuld-o-saqar mein ahl-e-qayamat chale gae

mujh ko bhi hukm kuchh mere parwardigar ho

bijli giri kabhi kabhi barish lahad pe ho

KHandan koi ho aur koi ashk-bar ho

gesu karo jo aa ke pareshan sar-e-lahad

phir kyon na zer-e-qabr mujhe intishaar ho

tum taDpo misl-e-mauj main taDpun misal-e-barq

tum ko na ho qarar na mujh ko qarar ho

ai shama mujh gharib ka baqi koi nahin

tu hi zara lahad pe mere ashk-bar ho

tir-e-nigah aap ka itna to ho bhala

dil toD kar baDhe to kaleje ke par ho

sunta hun baad marg ke hoti hai did-e-dost

de dun main apni jaan agar iKHtiyar ho

pahlu se dil nikal ke le jaiyega baad

pahle hamare aap ke qaul-o-qarar ho

turfa hai ye nasheb-o-faraaz-e-tariq-e-ishq

paidal jilau mein qais ho laila sawar ho

jati hain gar buland teri nawak-e-KHayal

'faKHir' falak pe tair-e-mazmun shikar ho