mauj-e-sarkash hun main na dariya hun

mauj-e-sarkash huuñ maiñ na dariyā huuñ

phir bhī ik manzar-e-tamāsha huuñ

chand qatroñ meñ vo huā sairāb

maiñ samundar huuñ phir bhī pyāsā huuñ

apnī hī justujū meñ gum tanhā

maiñ ghane jañgaloñ meñ rahtā huuñ

tum jo badle ho mausamoñ kī tarah

vaqt ke saath maiñ bhī badlā huuñ

merā maskan hai sīna-e-kohsār

maiñ ik ā.īna-e-sarāpā huuñ

vo hai shabnam ke ābgīnoñ meñ

maiñ ik āsūda-e-tamanna huuñ

'sāhil' us kī nigāh hai mujh par

bazm meñ ik taraf maiñ baiThā huuñ

mauj-e-sarkash hun main na dariya hun

phir bhi ek manzar-e-tamasha hun

chand qatron mein wo hua sairab

main samundar hun phir bhi pyasa hun

apni hi justuju mein gum tanha

main ghane jangalon mein rahta hun

tum jo badle ho mausamon ki tarah

waqt ke sath main bhi badla hun

mera maskan hai sina-e-kohsar

main ek aaina-e-sarapa hun

wo hai shabnam ke aabginon mein

main ek aasuda-e-tamanna hun

'sahil' us ki nigah hai mujh par

bazm mein ek taraf main baiTha hun