maut aati hai gham aata hai azab aata hai

maut aatī hai ġham aatā hai azaab aatā hai

saath in āfatoñ ko le ke shabāb aatā hai

āfateñ ā.eñgī ho jā.egā mahshar barpā

shoḳhiyāñ saath liye un kā shabāb aatā hai

ek hī baar javānī ho qayāmat aa jaa.e

naaz kartā huā kyoñ un kā shabāb aatā hai

us ke aane kī na jaane kī ḳhabar hotī hai

jaatā bhī vaise hī hai jaise shabāb aatā hai

yuuñ tirī tarah qayāmat nahīñ Dhātā koī

sab hī par ālam-e-hastī meñ shabāb aatā hai

sho.ala-rūyoñ kī mohabbat meñ phuñkā jaatā huuñ

dil jalāne ke liye ahd-e-shabāb aatā hai

har adā ban ke qazā jaan liye letī hai

un kā aThkheliyāñ kartā jo shabāb aatā hai

pesh-ḳhema hai javānī kā kisī kī mahram

joban uTh uTh ke ye kahtā hai shabāb aatā hai

chhīne jā.eñge jigar luuT diloñ kī hogī

lashkar-e-nāz liye un kā shabāb aatā hai

tum pe marte to haiñ aur is se sivā kyā hogā

kyoñ Darāte ho ye kah kah ke shabāb aatā hai

ḳhaak ho mujh ko ḳhushī un ke javāñ hone kī

merī hastī ke miTāne ko shabāb aatā hai

dekhiye hotī hai ab kaun sī aafat barpā

jis kā bachpan hai ġhazab us pe shabāb aatā hai

is qadar kyoñ dil-e-ushshāq haiñ ghabrā.e hue

kis sitam-kesh pe aalam meñ shabāb aatā hai

dekhiye girtī hai kitnoñ ke diloñ par bijlī

sunte haiñ dhuum se us but kā shabāb aatā hai

ye javānī hī to hai gulshan-e-hastī kā ubhār

aur ho jaatī hai sūrat jo shabāb aatā hai

shoḳhiyoñ ne tirī bechain kiyā kuchh aisā

dekhne ālam-e-tiflī ko shabāb aatā hai

jis tarah dhuup se aa jaa.e koī saaya meñ

itnī sī der ko insāñ pe shabāb aatā hai

parde parde meñ jatātā hai ye siine kā ubhār

le ke kuchh muTThiyoñ meñ un kā shabāb aatā hai

apnī barbādī kā pahle hī se mātam kar leñ

kahtī haiñ un kī adā.eñ ki shabāb aatā hai

saikḌoñ minnateñ is din ke liye maanī thiiñ

shukr kartā huuñ ki ab us pe shabāb aatā hai

rahte haiñ ḳhalq meñ afsāne sitam ke barsoñ

aur do din ko hasīnoñ pe shabāb aatā hai

milne vaalā hai qayāmat kā sitam ko rutba

husn us but kā baḌhāne ko shabāb aatā hai

qahr kī us ke bayāñ ho nahīñ saktī hālat

us se hī pūchhiye jis par ki shabāb aatā hai

aur ai 'bazm' kisī kā nahīñ kuchh bigḌegā

merī hī reḌh lagāne ko shabāb aatā hai

maut aati hai gham aata hai azab aata hai

sath in aafaton ko le ke shabab aata hai

aafaten aaengi ho jaega mahshar barpa

shoKHiyan sath liye un ka shabab aata hai

ek hi bar jawani ho qayamat aa jae

naz karta hua kyon un ka shabab aata hai

us ke aane ki na jaane ki KHabar hoti hai

jata bhi waise hi hai jaise shabab aata hai

yun teri tarah qayamat nahin Dhata koi

sab hi par aalam-e-hasti mein shabab aata hai

shoala-ruyon ki mohabbat mein phunka jata hun

dil jalane ke liye ahd-e-shabab aata hai

har ada ban ke qaza jaan liye leti hai

un ka aThkheliyan karta jo shabab aata hai

pesh-KHema hai jawani ka kisi ki mahram

joban uTh uTh ke ye kahta hai shabab aata hai

chhine jaenge jigar luT dilon ki hogi

lashkar-e-naz liye un ka shabab aata hai

tum pe marte to hain aur is se siwa kya hoga

kyon Daraate ho ye kah kah ke shabab aata hai

KHak ho mujh ko KHushi un ke jawan hone ki

meri hasti ke miTane ko shabab aata hai

dekhiye hoti hai ab kaun si aafat barpa

jis ka bachpan hai ghazab us pe shabab aata hai

is qadar kyon dil-e-ushshaq hain ghabrae hue

kis sitam-kesh pe aalam mein shabab aata hai

dekhiye girti hai kitnon ke dilon par bijli

sunte hain dhum se us but ka shabab aata hai

ye jawani hi to hai gulshan-e-hasti ka ubhaar

aur ho jati hai surat jo shabab aata hai

shoKHiyon ne teri bechain kiya kuchh aisa

dekhne aalam-e-tifli ko shabab aata hai

jis tarah dhup se aa jae koi saya mein

itni si der ko insan pe shabab aata hai

parde parde mein jatata hai ye sine ka ubhaar

le ke kuchh muTThiyon mein un ka shabab aata hai

apni barbaadi ka pahle hi se matam kar len

kahti hain un ki adaen ki shabab aata hai

saikDon minnaten is din ke liye mani thin

shukr karta hun ki ab us pe shabab aata hai

rahte hain KHalq mein afsane sitam ke barson

aur do din ko hasinon pe shabab aata hai

milne wala hai qayamat ka sitam ko rutba

husn us but ka baDhane ko shabab aata hai

qahr ki us ke bayan ho nahin sakti haalat

us se hi puchhiye jis par ki shabab aata hai

aur ai 'bazm' kisi ka nahin kuchh bigDega

meri hi reDh lagane ko shabab aata hai