mere alfaz ko guftar ko kha jaegi

mere alfāz ko guftār ko khā jā.egī

merī vahshat mire afkār ko khā jā.egī

ashk roko nahī bah jaane do varna ik din

ye namī jism kī dīvār ko khā jā.egī

baat sun yaar mire dasht hī behtar hai tujhe

terī vīrānī to bāzār ko khā jā.egī

jāntā thā mire kirdār ke ḳhāliq kī nazar

biich afsāne meñ kirdār ko khā jā.egī

vaqt hai ab bhī ḳhudā aa ke bachā le is ko

ye udāsī tire shahkār ko khā jā.egī

zindagī piir se hafte ko agar khīñch bhī ga.ī

maut ārām se itvār ko khā jā.egī

aah 'ahmad' ye tirī ishq meñ paane kī havas

ye tire ishq ke me.aar ko khā jā.egī

mere alfaz ko guftar ko kha jaegi

meri wahshat mere afkar ko kha jaegi

ashk roko nahi bah jaane do warna ek din

ye nami jism ki diwar ko kha jaegi

baat sun yar mere dasht hi behtar hai tujhe

teri virani to bazar ko kha jaegi

jaanta tha mere kirdar ke KHaliq ki nazar

bich afsane mein kirdar ko kha jaegi

waqt hai ab bhi KHuda aa ke bacha le is ko

ye udasi tere shahkar ko kha jaegi

zindagi pir se hafte ko agar khinch bhi gai

maut aaram se itwar ko kha jaegi

aah 'ahmad' ye teri ishq mein pane ki hawas

ye tere ishq ke mear ko kha jaegi