mere ehsasat ka aalam mera hi diwan lage

mere ehsāsāt kā aalam merā hī dīvān lage

lekin jab paḌhne ko baiThūñ zaḳhmoñ kī dūkān lage

terī qurbat se mujh par to itnī haqīqat khul hī ga.ī

mujh meñ basne vaalā insāñ mujh ko ab shaitān lage

ġham ke musalsal sadmoñ se mānūs ho gayā dil itnā

hañste rote insānoñ kī bastī bhī vīrān lage

avval avval begāna-pan āḳhir āḳhir hamdardī

TuuTe dil ke ḳhushk laboñ par mere ik muskān lage

dil se ho kar bargashta āñkhoñ kī raah jo niklā hai

qatra-e-ḳhūn-e-sar-e-dāman ab mujh ko ik armān lage

maiñ ne kab tum se kuchh chāhā kyoñ ye ināyat kyoñ ye karam

bin chāhe bin māñge daulat-mand kā na ehsān lage

itnī nazar to paidā kar o nazzāroñ ke matvāle

jis ā.īne ko dekhe vo ā.īna hairān lage

chashm-e-karam ne itnā navāzā dekhne vaale kahte haiñ

zaḳhm harā ho yā ristā ho nazroñ ko gul-dān lage

lamha lamha un kī qurbat dil meñ basī hai mere 'kamal'

tark-e-ta.alluq āsāñ hai ye kahnā to āsān lage

mere ehsasat ka aalam mera hi diwan lage

lekin jab paDhne ko baiThun zaKHmon ki dukan lage

teri qurbat se mujh par to itni haqiqat khul hi gai

mujh mein basne wala insan mujh ko ab shaitan lage

gham ke musalsal sadmon se manus ho gaya dil itna

hanste rote insanon ki basti bhi viran lage

awwal awwal begana-pan aaKHir aaKHir hamdardi

TuTe dil ke KHushk labon par mere ek muskan lage

dil se ho kar bargashta aankhon ki rah jo nikla hai

qatra-e-KHun-e-sar-e-daman ab mujh ko ek arman lage

main ne kab tum se kuchh chaha kyon ye inayat kyon ye karam

bin chahe bin mange daulat-mand ka na ehsan lage

itni nazar to paida kar o nazzaron ke matwale

jis aaine ko dekhe wo aaina hairan lage

chashm-e-karam ne itna nawaza dekhne wale kahte hain

zaKHm hara ho ya rista ho nazron ko gul-dan lage

lamha lamha un ki qurbat dil mein basi hai mere 'kamal'

tark-e-talluq aasan hai ye kahna to aasan lage