meri tarah sukun ke talabgar tum bhi ho

merī tarah sukūñ ke talabgār tum bhī ho

bīmār maiñ agar huuñ to bīmār tum bhī ho

maiñ dil kā shāhzāda huuñ tum raanī husn kī

maiñ huuñ agar amiir to zardār tum bhī ho

bhūle se bhī na aa.e kisī roz mere ghar

maiñ kaise maan luuñ ki milansār tum bhī ho

duniyā meñ koī bhī na rahe dard kā shikār

ġham baañT lo kisī kā jo ġham-ḳhvār tum bhī ho

ik dūsre pe rakhte haiñ donoñ kaḌī nazar

chālāk maiñ agar huuñ to hushiyār tum bhī ho

sarhad pe apnī jaan luTāne kā vaqt hai

aao agar vatan ke vafādār tum bhī ho

duniyā se laḌ to saktā thā lekin laḌūñgā kyā

auroñ ke saath darpa.e-āzār tum bhī ho

tesha uThā liyā hai to phir kaise baḳhsh duuñ

auroñ kī tarah raah meñ dīvār tum bhī ho

āñkheñ to kah rahī haiñ ki bas jī rahe ho tum

goyā ḳhud apnī ziist se bezār tum bhī ho

dāman-kushā.ī kyā kareñ bandoñ ke sāmne

'ahsan' mujhe yaqīñ hai ki ḳhud.dār tum bhī ho

meri tarah sukun ke talabgar tum bhi ho

bimar main agar hun to bimar tum bhi ho

main dil ka shahzada hun tum rani husn ki

main hun agar amir to zardar tum bhi ho

bhule se bhi na aae kisi roz mere ghar

main kaise man lun ki milansar tum bhi ho

duniya mein koi bhi na rahe dard ka shikar

gham banT lo kisi ka jo gham-KHwar tum bhi ho

ek dusre pe rakhte hain donon kaDi nazar

chaalak main agar hun to hushiyar tum bhi ho

sarhad pe apni jaan luTane ka waqt hai

aao agar watan ke wafadar tum bhi ho

duniya se laD to sakta tha lekin laDunga kya

auron ke sath darpae-azar tum bhi ho

tesha uTha liya hai to phir kaise baKHsh dun

auron ki tarah rah mein diwar tum bhi ho

aankhen to kah rahi hain ki bas ji rahe ho tum

goya KHud apni zist se bezar tum bhi ho

daman-kushai kya karen bandon ke samne

'ahsan' mujhe yaqin hai ki KHuddar tum bhi ho