meri chashm-e-tamasha-bin ki hairani nahin jati

mirī chashm-e-tamāsha-bīñ ki hairānī nahīñ jaatī

magar husn-e-azal kī jalva-sāmānī nahīñ jaatī

shahādat naujavānān-e-vatan kī rang laatī hai

amal kī raah meñ be-kār qurbānī nahīñ jaatī

koī tinkā abhī baaqī hai shāyad āshiyāne meñ

jo ab tak barq kī ye sho.ala-sāmānī nahīñ jaatī

chaman meñ muddatoñ se garche ye daur-e-bahārāñ hai

magar ab bhī guloñ kī chāk-dāmānī nahīñ jaatī

vahī āñkheñ jinheñ zauq-e-basīrat ham ne baḳhshā thā

unhī se ab hamārī shakl pahchānī nahīñ jaatī

kabhī apne ishāroñ par ye duniyā raqs kartī thī

magar ab to hamārī baat bhī maanī nahīñ jaatī

chaman meñ manzar-e-barbādī-e-gul jab se dekhā hai

kisī sūrat mirī āñkhoñ kī hairānī nahīñ jaatī

tumhāre sar hai kitnā ḳhūn-e-nāhaq be-gunāhoñ kā

magar phir bhī tumhārī pāk-dāmānī nahīñ jaatī

hazāroñ inqalāb aa.e haiñ duniyā meñ magar 'tal.at'

sukūñ nā-āshnā dil kī pareshānī nahīñ jaatī

meri chashm-e-tamasha-bin ki hairani nahin jati

magar husn-e-azal ki jalwa-samani nahin jati

shahadat naujawanan-e-watan ki rang lati hai

amal ki rah mein be-kar qurbani nahin jati

koi tinka abhi baqi hai shayad aashiyane mein

jo ab tak barq ki ye shoala-samani nahin jati

chaman mein muddaton se garche ye daur-e-bahaaran hai

magar ab bhi gulon ki chaak-damani nahin jati

wahi aankhen jinhen zauq-e-basirat hum ne baKHsha tha

unhi se ab hamari shakl pahchani nahin jati

kabhi apne ishaaron par ye duniya raqs karti thi

magar ab to hamari baat bhi mani nahin jati

chaman mein manzar-e-barbaadi-e-gul jab se dekha hai

kisi surat meri aankhon ki hairani nahin jati

tumhaare sar hai kitna KHun-e-nahaq be-gunahon ka

magar phir bhi tumhaari pak-damani nahin jati

hazaron inqalab aae hain duniya mein magar 'talat'

sukun na-ashna dil ki pareshani nahin jati