meri nazar bas meri nazar thi magar tumhaari nazar se pahle

mirī nazar bas mirī nazar thī magar tumhārī nazar se pahle

vajūd se apne be-ḳhabar thā magar tumhārī ḳhabar se pahle

ye shab kī tārīkiyāñ bhī kab se tire hī jalve kī muntazir haiñ

magar ai ḳhurshīd-e-tābāñ terī ziyā ho kyūñkar sahar se pahle

rahe ho pāband rasm-e-kohna ke mai-kade meñ bhī tum vagarna

nigāh-e-sāqī meñ thā ishāra batāo duuñ maiñ kidhar se pahle

hujūm hai mai-kashoñ kā saaqī tirī bhī dariyā-dilī kī ḳhātir

har ek lab par yahī sadā hai idhar se pahle idhar se pahle

jahāñ ko ham ne lahū se apne ye bazm-ārā.iyāñ atā kiiñ

kahāñ thī ye raushnī batāo hamāre ḳhūn-e-jigar se pahle

nagar huā jal ke ḳhaak saarā kise ḳhabar hai ḳhayāl kis ko

hameñ pata hai to sirf itnā lagī thī aag apne ghar se pahle

chalūñgā maiñ saath kārvāñ ke magar zarā Thahr jaao 'faizī'

kahāñ luTegā ye kārvāñ phir ye pūchh luuñ rāhbar se pahle

meri nazar bas meri nazar thi magar tumhaari nazar se pahle

wajud se apne be-KHabar tha magar tumhaari KHabar se pahle

ye shab ki tarikiyan bhi kab se tere hi jalwe ki muntazir hain

magar ai KHurshid-e-taban teri ziya ho kyunkar sahar se pahle

rahe ho paband rasm-e-kohna ke mai-kade mein bhi tum wagarna

nigah-e-saqi mein tha ishaara batao dun main kidhar se pahle

hujum hai mai-kashon ka saqi teri bhi dariya-dili ki KHatir

har ek lab par yahi sada hai idhar se pahle idhar se pahle

jahan ko hum ne lahu se apne ye bazm-araiyan ata kin

kahan thi ye raushni batao hamare KHun-e-jigar se pahle

nagar hua jal ke KHak sara kise KHabar hai KHayal kis ko

hamein pata hai to sirf itna lagi thi aag apne ghar se pahle

chalunga main sath karwan ke magar zara Thahr jao 'faizi'

kahan luTega ye karwan phir ye puchh lun rahbar se pahle