mohabbat ka talatum-KHez tufan dil se uThta hai

mohabbat kā talātum-ḳhez tūfāñ dil se uThtā hai

ye vo sailāb hai jo sīna-e-sāhil se uThtā hai

vufūr-e-shauq-e-dīd-o-jazba-e-kāmil se uThtā hai

naqāb uThtā to hai lekin baḌī mushkil se uThtā hai

koī jab bā-dil-e-nāḳhvāsta mahfil se uThtā hai

qadam uThtā to hai us kā magar mushkil se uThtā hai

bhaTaktā hai koī gum-karda-manzil raah meñ shāyad

ġhubār us kā abhī tak jāda-e-manzil se uThtā hai

dam-e-nazzāra gir jaatā hai majnūñ kī nigāhoñ par

vahī parda jo lailā ke dar-e-mahmil se uThtā hai

jalātī sham.a hai yā aap jal jaatā hai parvāna

bahar-sūrat ye fitna aap kī mahfil se uThtā hai

kaleje meñ kabhī jab ātish-e-ulfat sulagtī hai

jigar se kuchh dhuāñ uThtā hai sho.ala dil se uThtā hai

kaho bād-e-muḳhālif se batā do mauj-e-tūfāñ ko

mirī kashtī kā langar dāman-e-sāhil se uThtā hai

tasavvur meñ nazar aatā hai jalva be-naqāb un kā

jab āñkheñ band hotī haiñ to parda dil se uThtā hai

ubharnā hai to yād-e-talḳhī-e-māzī se kyā hāsil

jab uThtā hai koī ummīd-e-mustaqbil se uThtā hai

farishte aaj tak hairān haiñ insāñ kī himmat par

ye bār-e-ishq ai 'tal.at' baḌī mushkil se uThtā hai

mohabbat ka talatum-KHez tufan dil se uThta hai

ye wo sailab hai jo sina-e-sahil se uThta hai

wufur-e-shauq-e-did-o-jazba-e-kaamil se uThta hai

naqab uThta to hai lekin baDi mushkil se uThta hai

koi jab ba-dil-e-naKHwasta mahfil se uThta hai

qadam uThta to hai us ka magar mushkil se uThta hai

bhaTakta hai koi gum-karda-manzil rah mein shayad

ghubar us ka abhi tak jada-e-manzil se uThta hai

dam-e-nazzara gir jata hai majnun ki nigahon par

wahi parda jo laila ke dar-e-mahmil se uThta hai

jalati shama hai ya aap jal jata hai parwana

bahar-surat ye fitna aap ki mahfil se uThta hai

kaleje mein kabhi jab aatish-e-ulfat sulagti hai

jigar se kuchh dhuan uThta hai shoala dil se uThta hai

kaho baad-e-muKHalif se bata do mauj-e-tufan ko

meri kashti ka langar daman-e-sahil se uThta hai

tasawwur mein nazar aata hai jalwa be-naqab un ka

jab aankhen band hoti hain to parda dil se uThta hai

ubharna hai to yaad-e-talKHi-e-mazi se kya hasil

jab uThta hai koi ummid-e-mustaqbil se uThta hai

farishte aaj tak hairan hain insan ki himmat par

ye bar-e-ishq ai 'talat' baDi mushkil se uThta hai