na bhula jaega tum se gham-e-be-intiha mera

na bhūlā jā.egā tum se ġham-e-be-intihā merā

rahegā dard ban kar dil meñ ehsās-e-vafā merā

salāmat hai ye jab tak jazba-e-zauq-e-rasā merā

bigāḌegī bhalā kyā ye zamāne kī havā merā

tajallī husn-e-zebā kī bahāreñ rū-e-raushan kī

inhīñ rangīniyoñ meñ dil bhī shāyad kho gayā merā

tumhīñ par chhoḌtā huuñ munsifī jurm-e-mohabbat kī

na raas aa.egā aisī kashmakash meñ faisla merā

mujhe barbād hone meñ ta.ammul kuchh nahīñ lekin

koī manshā-e-barbādī to samjhā de zarā merā

tumheñ aanā paḌegā āḳhirī dīdār-e-mayyat par

tum apnī aañkh se dekhoge anjām-e-vafā merā

fazā-e-ḳhātir-e-ġhamgīñ se vīrānī chhalaktī hai

koī muñh dekh le ai 'zeb' hangām-e-fanā merā

na bhula jaega tum se gham-e-be-intiha mera

rahega dard ban kar dil mein ehsas-e-wafa mera

salamat hai ye jab tak jazba-e-zauq-e-rasa mera

bigaDegi bhala kya ye zamane ki hawa mera

tajalli husn-e-zeba ki bahaaren ru-e-raushan ki

inhin ranginiyon mein dil bhi shayad kho gaya mera

tumhin par chhoDta hun munsifi jurm-e-mohabbat ki

na ras aaega aisi kashmakash mein faisla mera

mujhe barbaad hone mein tammul kuchh nahin lekin

koi mansha-e-barbaadi to samjha de zara mera

tumhein aana paDega aaKHiri didar-e-mayyat par

tum apni aankh se dekhoge anjam-e-wafa mera

faza-e-KHatir-e-ghamgin se virani chhalakti hai

koi munh dekh le ai 'zeb' hangam-e-fana mera