nahin bad bhi nahin achchha agarche

nahīñ bad bhī nahīñ achchhā agarche

use samjhī nahīñ duniyā agarche

magar ham sahte sahte sah ga.e haiñ

judā.ī thī baḌā sadma agarche

dukāñ par baiThte to haiñ tumhārī

nahīñ lete haiñ ham saudā agarche

magar phir bhī bahut bikhrā paḌā huuñ

kiyā ḳhud ko bahut yakjā agarche

tumhāre kaam aane kā nahīñ hai

tumhāre paas hai paisa agarche

magar tum sā kahāñ se mil sakegā

yahāñ har koī hai tum sā agarche

magar ham lāziman pūchheñge us ko

hameñ us ne nahīñ pūchhā agarche

magar har baar toḌī terī ḳhātir

bahut ham ne bhī kī tauba agarche

hai mere saath lashkar vasvasoñ kā

ba-zāhir huuñ bahut tanhā agarche

magar is meñ nahīñ hai lau zarā bhī

mirī āñkhoñ kā hai taarā agarche

magar is par guzāra hai hamārā

tumhārā pyaar hai thoḌā agarche

magar rusvā.ī ke zumre meñ hai vo

har ik sū hai tirā charchā agarche

magar khānā hai majbūrī hamārī

mohabbat hai nirā dhokā agarche

batā dete haiñ chehre kī zabānī

hamāre lab pe hai taalā agarche

chalo apnā sharīk-e-rizq to hai

nahīñ vo kaam kā banda agarche

hameñ sairāb karne se hai qāsir

hamāre dil meñ hai dariyā agarche

use phir bhī na hāsil kar sake ham

hamārī dastaras meñ thā agarche

nahīñ Thahrā vo Thahrā hī nahīñ hai

kiyā ham ne bahut girya agarche

magar achchhī tarah kab dekh paa.e

use ham ne bahut ghūrā agarche

ta'alluq be-ruḳhī kā to hai maujūd

nahīñ un se mirā rishta agarche

chalātā hai ḳhudā-e-pāk 'nāmī'

ziyāda hai mirā ḳharcha agarche

nahin bad bhi nahin achchha agarche

use samjhi nahin duniya agarche

magar hum sahte sahte sah gae hain

judai thi baDa sadma agarche

dukan par baiThte to hain tumhaari

nahin lete hain hum sauda agarche

magar phir bhi bahut bikhra paDa hun

kiya KHud ko bahut yakja agarche

tumhaare kaam aane ka nahin hai

tumhaare pas hai paisa agarche

magar tum sa kahan se mil sakega

yahan har koi hai tum sa agarche

magar hum laziman puchhenge us ko

hamein us ne nahin puchha agarche

magar har bar toDi teri KHatir

bahut hum ne bhi ki tauba agarche

hai mere sath lashkar waswason ka

ba-zahir hun bahut tanha agarche

magar is mein nahin hai lau zara bhi

meri aankhon ka hai tara agarche

magar is par guzara hai hamara

tumhaara pyar hai thoDa agarche

magar ruswai ke zumre mein hai wo

har ek su hai tera charcha agarche

magar khana hai majburi hamari

mohabbat hai nira dhoka agarche

bata dete hain chehre ki zabani

hamare lab pe hai tala agarche

chalo apna sharik-e-rizq to hai

nahin wo kaam ka banda agarche

hamein sairab karne se hai qasir

hamare dil mein hai dariya agarche

use phir bhi na hasil kar sake hum

hamari dastaras mein tha agarche

nahin Thahra wo Thahra hi nahin hai

kiya hum ne bahut girya agarche

magar achchhi tarah kab dekh pae

use hum ne bahut ghura agarche

ta'alluq be-ruKHi ka to hai maujud

nahin un se mera rishta agarche

chalata hai KHuda-e-pak 'nami'

ziyaada hai mera KHarcha agarche