nahin jo teri KHushi lab pe kyun hansi aae

nahīñ jo terī ḳhushī lab pe kyuuñ hañsī aa.e

yahī bahut hai ki āñkhoñ meñ kuchh namī aa.e

añdherī raat meñ kāsa-ba-dast baiThā huuñ

nahīñ ye aas ki āñkhoñ meñ raushnī aa.e

mile vo ham se magar jaise ġhair milte haiñ

vo aa.e dil meñ magar jaise ajnabī aa.e

ḳhud apne haal pe rotī rahī hai ye duniyā

hamāre haal pe duniyā ko kyuuñ hañsī aa.e

na jaane kitne zamānoñ se ham bahakte haiñ

faqīh bahke to kuchh lutf-e-mai-kashī aa.e

salīb-o-dār ke qisse bahut purāne haiñ

salīb-o-dār to hamrāh-e-zindagī aa.e

harī na ho na sahī shāḳh-e-naḳhl ġham kī 'arīb'

hamāre girya-e-paiham meñ kyuuñ kamī aa.e

nahin jo teri KHushi lab pe kyun hansi aae

yahi bahut hai ki aankhon mein kuchh nami aae

andheri raat mein kasa-ba-dast baiTha hun

nahin ye aas ki aankhon mein raushni aae

mile wo hum se magar jaise ghair milte hain

wo aae dil mein magar jaise ajnabi aae

KHud apne haal pe roti rahi hai ye duniya

hamare haal pe duniya ko kyun hansi aae

na jaane kitne zamanon se hum bahakte hain

faqih bahke to kuchh lutf-e-mai-kashi aae

salib-o-dar ke qisse bahut purane hain

salib-o-dar to hamrah-e-zindagi aae

hari na ho na sahi shaKH-e-naKHl gham ki 'arib'

hamare girya-e-paiham mein kyun kami aae