naqsh-e-qadam mile jo tere chal ke sar se hum

naqsh-e-qadam mile jo tire chal ke sar se ham

aksar guzar ga.e haiñ tirī rahguzar se ham

haiñ be-niyāz tandahī-e-chārāgar se ham

be-ḳhud rahe ināyat-e-dard-e-jigar se ham

samjhe jahāñ ko apnā baḌe karr-o-far se ham

dekhe ga.e hamesha parā.ī nazar se ham

naqsh-e-qadam se chimTe tirī rahguzar se ham

par terī diid ko rahe tarse ke tarse ham

ham dekhte haiñ tum ko hamārī nigāh se

ġhairoñ ko dekhte haiñ tumhārī nazar se ham

mahfūz kar le apne liye ġham-gusāriyāñ

sayyād bā-ḳhabar haiñ tire ḳhair-o-shar se ham

tum ko samajh ke tum sitam apne pe Dhā liye

kis darje be-ḳhabar haiñ hamārī ḳhabar se ham

allāh shaiḳh jī ko tū jannat kare nasīb

vābasta sub.h-o-shām raheñ un ke dar se ham

laate na tere ishq meñ shikve zabān par

aap apne ko samajhte agar peshtar se ham

ham tere ho ke bazm meñ terī na rah sake

mahfil thī terī aañkh sī terī nazar se ham

yā paar hoñge chiir ke yā Duub jā.eñge

sāhil pe ruk na jā.eñge tūfāñ ke Dar se ham

niklī huī duā.eñ abhī justujū meñ haiñ

shāyad ba.īd-tar haiñ maqām-e-asar se ham

nazroñ se sab kī gir ga.e parvā na thī hameñ

lekin ġhazab hai girte haiñ apnī nazar se ham

kyā hashr hone vaalā hai dekheñge ai 'zakī'

baiThe haiñ dil lagā ke kisī fitna-gar se ham

naqsh-e-qadam mile jo tere chal ke sar se hum

aksar guzar gae hain teri rahguzar se hum

hain be-niyaz tandahi-e-chaaragar se hum

be-KHud rahe inayat-e-dard-e-jigar se hum

samjhe jahan ko apna baDe karr-o-far se hum

dekhe gae hamesha parai nazar se hum

naqsh-e-qadam se chimTe teri rahguzar se hum

par teri did ko rahe tarse ke tarse hum

hum dekhte hain tum ko hamari nigah se

ghairon ko dekhte hain tumhaari nazar se hum

mahfuz kar le apne liye gham-gusariyan

sayyaad ba-KHabar hain tere KHair-o-shar se hum

tum ko samajh ke tum sitam apne pe Dha liye

kis darje be-KHabar hain hamari KHabar se hum

allah shaiKH ji ko tu jannat kare nasib

wabasta subh-o-sham rahen un ke dar se hum

late na tere ishq mein shikwe zaban par

aap apne ko samajhte agar peshtar se hum

hum tere ho ke bazm mein teri na rah sake

mahfil thi teri aankh si teri nazar se hum

ya par honge chir ke ya Dub jaenge

sahil pe ruk na jaenge tufan ke Dar se hum

nikli hui duaen abhi justuju mein hain

shayad baid-tar hain maqam-e-asar se hum

nazron se sab ki gir gae parwa na thi hamein

lekin ghazab hai girte hain apni nazar se hum

kya hashr hone wala hai dekhenge ai 'zaki'

baiThe hain dil laga ke kisi fitna-gar se hum