nasl wo baqi kahan bachi hai hijrat karne walon ki

nasl vo baaqī kahāñ bachī hai hijrat karne vāloñ kī

ab to qatāreñ lagī huī haiñ jaise marne vāloñ kī

khulī huī hai chhat par khiḌkī ek purāne kamre kī

jis se koī dekhā kartā thā shakl guzarne vāloñ kī

kuchh din un meñ rah kar dekhā to ik dam ehsās huā

kaisī hai be-rang sī duniyā banñe-sañvarne vāloñ kī

dekho yaar is ḳhālī ghar se barsoñ baa'd bhī shaam Dhale

āvāzeñ aatī rahtī haiñ aa.heñ bharne vāloñ kī

kitnī chīzeñ paḌī huī haiñ bāhar be-tartībī se

apne andar lamha-lamha roz bikharne vāloñ kī

tanhā.ī kī gard meñ lipTī bol rahī haiñ tasvīreñ

āñkhoñ meñ to jhāñk ke dekho ḳhud se Darne vāloñ kī

āhista āhista sab kirdār 'ayāñ ho jā.eñge

pusht-panāhī karte rahe haiñ jo bhī dharne vāloñ kī

chehre 'zahūr' ab yaad nahīñ haiñ itnā yaad hai lahroñ meñ

chīḳheñ sunī thiiñ logoñ ne dariyā meñ utarne vāloñ kī

nasl wo baqi kahan bachi hai hijrat karne walon ki

ab to qataren lagi hui hain jaise marne walon ki

khuli hui hai chhat par khiDki ek purane kamre ki

jis se koi dekha karta tha shakl guzarne walon ki

kuchh din un mein rah kar dekha to ek dam ehsas hua

kaisi hai be-rang si duniya banne-sanwarne walon ki

dekho yar is KHali ghar se barson ba'd bhi sham Dhale

aawazen aati rahti hain aahen bharne walon ki

kitni chizen paDi hui hain bahar be-tartibi se

apne andar lamha-lamha roz bikharne walon ki

tanhai ki gard mein lipTi bol rahi hain taswiren

aankhon mein to jhank ke dekho KHud se Darne walon ki

aahista aahista sab kirdar 'ayan ho jaenge

pusht-panahi karte rahe hain jo bhi dharne walon ki

chehre 'zahur' ab yaad nahin hain itna yaad hai lahron mein

chiKHen suni thin logon ne dariya mein utarne walon ki