nazar bhar kar wo kya tujhko dil-e-dil-gir dekhenge

nazar bhar kar vo kyā tujh ko dil-e-dil-gīr dekheñge

vo jab dekheñge apne husn kī tasvīr dekheñge

baḌī hasrat se tujh ko āsmān-e-pīr dekheñge

giraftārī hamārī ham jo be-taqsīr dekheñge

ma.āl-e-hasrat-e-nākāmī-e-dil sāmne hogā

kitāb-e-ishq meñ jab ishq kī tafsīr dekheñge

agar chashm-e-karam-parvar se dekheñ ro paḌeñ fauran

hamārī ḳhasta-hālī kī agar tasvīr dekheñge

rahegā pā-e-vahshat-āshnā ik ḳhvāb kī sūrat

baḌī hasrat se jab vo ḳhāna-e-zanjīr dekheñge

nigāhoñ meñ kisī kā husn-e-ālamgīr hī hogā

havas dast-e-zuleḳhā kī jo dāman-gīr dekheñge

nazar bhar kar wo kya tujh ko dil-e-dil-gir dekhenge

wo jab dekhenge apne husn ki taswir dekhenge

baDi hasrat se tujh ko aasman-e-pir dekhenge

giraftari hamari hum jo be-taqsir dekhenge

maal-e-hasrat-e-nakaami-e-dil samne hoga

kitab-e-ishq mein jab ishq ki tafsir dekhenge

agar chashm-e-karam-parwar se dekhen ro paDen fauran

hamari KHasta-haali ki agar taswir dekhenge

rahega pa-e-wahshat-ashna ek KHwab ki surat

baDi hasrat se jab wo KHana-e-zanjir dekhenge

nigahon mein kisi ka husn-e-alamgir hi hoga

hawas dast-e-zuleKHa ki jo daman-gir dekhenge