nazar uTThi jidhar teri udhar hi maine jaan rakh di

nazar uTThī jidhar terī udhar hī maiñ ne jaañ rakh dī

magar hairāñ huuñ maiñ ḳhud bhī matā-e-jāñ kahāñ rakh dī

jise denā thā de Daalā nahīñ dil koī aisī shai

idhar rakh dī udhar rakh dī yahāñ rakh dī vahāñ rakh dī

tujhe āvāz detā huuñ maiñ jab tanhā.ī paatā huuñ

nihāñ-ḳhāne meñ dil ke ik na.ī tarz-e-fuġhāñ rakh dī

bahut chāhā ki hāl-e-dil kabhī koī na sun paa.e

magar kambaḳht āñkhoñ ne ḳhamoshī meñ zabāñ rakh dī

anāsir meñ baḌā haijān thā tūfāñ sā barpā thā

binā duniyā kī aise meñ kisī ne nā-gahāñ rakh dī

chamak in motiyoñ kī aur bhī do-chand honī thī

ḳhud apne fan pe maiñ ne hī nigāh-e-nāqidāñ rakh dī

ināyat dil kī hai ishq-e-haqīqī ho majāzī ho

yahī ik baat hai jo dāstāñ-dar-dāstāñ rakh dī

miTā dī apnī hastī phir bhī duniyā kuchh na de paa.ī

jabīñ mujh ko kahāñ rakhnī thī aur maiñ ne kahāñ rakh dī

chalā.e jaate tum bhī tiir nā-hanjār duniyā par

magar 'rizvān' tum ne bhī to āḳhir meñ kamāñ rakh dī

nazar uTThi jidhar teri udhar hi main ne jaan rakh di

magar hairan hun main KHud bhi mata-e-jaan kahan rakh di

jise dena tha de Dala nahin dil koi aisi shai

idhar rakh di udhar rakh di yahan rakh di wahan rakh di

tujhe aawaz deta hun main jab tanhai pata hun

nihan-KHane mein dil ke ek nai tarz-e-fughan rakh di

bahut chaha ki haal-e-dil kabhi koi na sun pae

magar kambaKHt aankhon ne KHamoshi mein zaban rakh di

anasir mein baDa haijaan tha tufan sa barpa tha

bina duniya ki aise mein kisi ne na-gahan rakh di

chamak in motiyon ki aur bhi do-chand honi thi

KHud apne fan pe main ne hi nigah-e-naqidan rakh di

inayat dil ki hai ishq-e-haqiqi ho majazi ho

yahi ek baat hai jo dastan-dar-dastan rakh di

miTa di apni hasti phir bhi duniya kuchh na de pai

jabin mujh ko kahan rakhni thi aur main ne kahan rakh di

chalae jate tum bhi tir na-hanjar duniya par

magar 'rizwan' tum ne bhi to aaKHir mein kaman rakh di