pas-ghubar-e-hawas raat Dhalti rahti hai

pas-ġhubār-e-havas raat Dhaltī rahtī hai

nashe meñ chuur pighaltī machaltī rahtī hai

ḳhabar yahī hai ki āġhosh-e-hijr meñ pahroñ

tumhārī yaad bhī pahlū badaltī rahtī hai

ye maiñ ne dekhā hai aksar phaTī purānī hayāt

sar-e-darīcha-e-shab haath maltī rahtī hai

qafas se ham bhī nikalne ko kab se haiñ be-tāb

magar vo sā.at-e-āḳhir jo Taltī rahtī hai

vo rang rang bahārāñ hai khultā rahtā hai

vo shāḳh shāḳh samar-var hai phaltī rahtī hai

hai ek kār-e-ziyāñ shahr shahr dar-badarī

magar yahī ki tabī'at bahaltī rahtī hai

pas-ghubar-e-hawas raat Dhalti rahti hai

nashe mein chur pighalti machalti rahti hai

KHabar yahi hai ki aaghosh-e-hijr mein pahron

tumhaari yaad bhi pahlu badalti rahti hai

ye main ne dekha hai aksar phaTi purani hayat

sar-e-daricha-e-shab hath malti rahti hai

qafas se hum bhi nikalne ko kab se hain be-tab

magar wo saat-e-aKHir jo Talti rahti hai

wo rang rang bahaaran hai khulta rahta hai

wo shaKH shaKH samar-war hai phalti rahti hai

hai ek kar-e-ziyan shahr shahr dar-badari

magar yahi ki tabi'at bahalti rahti hai