phir insanon ki ghairat ne shaitanon ka munh pher diya

phir insānoñ kī ġhairat ne shaitānoñ kā muñh pher diyā

phir himmat-e-mard-e-mujāhid ne tūfānoñ kā muñh pher diyā

phir āzādī ne sabaq diyā āzādī ke matvāloñ ko

phir sham' ne raushan hote hī parvānoñ kā muñh pher diyā

insāf kī sachchī ḳhvāhish ne mahrūmoñ ko phir uksāyā

phir insānoñ ne shahzādoñ aur ḳhānoñ kā muñh pher diyā

phir ḳhalvat se mahrūm kiyā muḳhtāroñ ko majbūroñ ne

phir diid kī tālib duniyā ne darbānoñ kā muñh pher diyā

phir palkeñ bhīgī bhīgī haiñ phir chehra utrā utrā hai

mā'lūm huā dīvānoñ ne dīvānoñ kā muñh pher diyā

dozaḳh se hameñ is bastī meñ jannat kā tasavvur laayā thā

is hindī sindhī jhagḌe ne armānoñ kā muñh pher diyā

phir insanon ki ghairat ne shaitanon ka munh pher diya

phir himmat-e-mard-e-mujahid ne tufanon ka munh pher diya

phir aazadi ne sabaq diya aazadi ke matwalon ko

phir sham' ne raushan hote hi parwanon ka munh pher diya

insaf ki sachchi KHwahish ne mahrumon ko phir uksaya

phir insanon ne shahzadon aur KHanon ka munh pher diya

phir KHalwat se mahrum kiya muKHtaron ko majburon ne

phir did ki talib duniya ne darbanon ka munh pher diya

phir palken bhigi bhigi hain phir chehra utra utra hai

ma'lum hua diwanon ne diwanon ka munh pher diya

dozaKH se hamein is basti mein jannat ka tasawwur laya tha

is hindi sindhi jhagDe ne armanon ka munh pher diya