phir naghma-rez abr-e-bahaaran hai aaj-kal

phir naġhma-rez abr-e-bahārāñ hai āj-kal

phir chāk-e-dil ba-qadr-e-garebāñ hai āj-kal

rañgīnī-e-bahār kā allāh re fusūñ

sāz-e-dil-e-shikasta ġhazal-ḳhvāñ hai āj-kal

phir maiñ huuñ aur mahfil-e-jānāñ kī aarzū

phir mehrbāñ siyāsat-e-darbāñ hai āj-kal

vo sajda jo bahā.e do-ālam se hai garāñ

merī jabīn-e-shauq meñ ġhaltāñ hai āj-kal

ye abr ye havā ye barastī huī sharāb

kāfir hai saḳht vo jo musalmāñ hai āj-kal

saaqī ne vā kiyā dar-e-mai-ḳhāna-e-hayāt

fitrat kī chashm-e-mehr pashemāñ hai āj-kal

maiñ aur daur-e-sāġhar-o-mīnā hai in dinoñ

āñkheñ haiñ aur tasavvur-e-jānāñ hai āj-kal

pahle bhī itr-bez nasīm-e-bahār thī

kis kī shamīm-e-zulf pareshāñ hai āj-kal

bhātī nahīñ hai dil ko kisī saaz kī sadā

naġhmoñ kā har-nafas meñ vo tūfāñ hai āj-kal

zholīdgī na pūchh fazāoñ meñ ham-nashīñ

ḳhushbū-e-zulf-e-dost pareshāñ hai āj-kal

har jalva-e-hayāt ba-qadr-e-nishāt-o-rañg

minnat-kash-e-tabassum-e-jānāñ hai āj-kal

ai rūh-e-dard-o-shād ye terā hī faiz hai

'jauhar' jo is adā se ġhazal-ḳhvāñ hai āj-kal

phir naghma-rez abr-e-bahaaran hai aaj-kal

phir chaak-e-dil ba-qadr-e-gareban hai aaj-kal

rangini-e-bahaar ka allah re fusun

saz-e-dil-e-shikasta ghazal-KHwan hai aaj-kal

phir main hun aur mahfil-e-jaanan ki aarzu

phir mehrban siyasat-e-darban hai aaj-kal

wo sajda jo bahae do-alam se hai garan

meri jabin-e-shauq mein ghaltan hai aaj-kal

ye abr ye hawa ye barasti hui sharab

kafir hai saKHt wo jo musalman hai aaj-kal

saqi ne wa kiya dar-e-mai-KHana-e-hayat

fitrat ki chashm-e-mehr pasheman hai aaj-kal

main aur daur-e-saghar-o-mina hai in dinon

aankhen hain aur tasawwur-e-jaanan hai aaj-kal

pahle bhi itr-bez nasim-e-bahaar thi

kis ki shamim-e-zulf pareshan hai aaj-kal

bhati nahin hai dil ko kisi saz ki sada

naghmon ka har-nafas mein wo tufan hai aaj-kal

zholidgi na puchh fazaon mein ham-nashin

KHushbu-e-zulf-e-dost pareshan hai aaj-kal

har jalwa-e-hayat ba-qadr-e-nishat-o-rang

minnat-kash-e-tabassum-e-jaanan hai aaj-kal

ai ruh-e-dard-o-shad ye tera hi faiz hai

'jauhar' jo is ada se ghazal-KHwan hai aaj-kal