qafila ja ke usi dasht mein Thahra apna

qāfila jā ke usī dasht meñ Thahrā apnā

ḳhud pe rakhte haiñ jahāñ peḌ bhī saayā apnā

us jagah le ke mujhe tishna-labī aa.ī hai

ḳhud hī pī letā hai paanī jahāñ dariyā apnā

ham kisī ġhair ke sharminda-e-ehsān na hue

ham ne ḳhud baḌh ke uThāyā hai janāzā apnā

ugtī rahtī haiñ yahāñ shams-o-qamar kī fasleñ

kyā kamī ham ko salāmat rahe sahrā apnā

log hī saare bure haiñ ki kamī tujh meñ hai

ā.īna rakh ke zarā dekh tū chehrā apnā

rāhbar mujh ko nahīñ chāhiye terī manzil

mere qadmoñ se uThā le jā ye rastā apnā

fāsla apnoñ se kuchh aur baḌhā aur baḌhā

hoñge sab apne agar koī na hogā apnā

vaqf hai roz-e-azal hī se kisī aur ke naam

apne kis kaam kā hai ḳhuun pasīnā apnā

un charāġhoñ se kabhī lau na lagānā 'kāzim'

jin ko ḳhud apne liye kam hai ujālā apnā

qafila ja ke usi dasht mein Thahra apna

KHud pe rakhte hain jahan peD bhi saya apna

us jagah le ke mujhe tishna-labi aai hai

KHud hi pi leta hai pani jahan dariya apna

hum kisi ghair ke sharminda-e-ehsan na hue

hum ne KHud baDh ke uThaya hai janaza apna

ugti rahti hain yahan shams-o-qamar ki faslen

kya kami hum ko salamat rahe sahra apna

log hi sare bure hain ki kami tujh mein hai

aaina rakh ke zara dekh tu chehra apna

rahbar mujh ko nahin chahiye teri manzil

mere qadmon se uTha le ja ye rasta apna

fasla apnon se kuchh aur baDha aur baDha

honge sab apne agar koi na hoga apna

waqf hai roz-e-azal hi se kisi aur ke nam

apne kis kaam ka hai KHun pasina apna

un charaghon se kabhi lau na lagana 'kazim'

jin ko KHud apne liye kam hai ujala apna