qadam jo rah-e-mohabbat mein thakne lagta hai

qadam jo rāh-e-mohabbat meñ thakne lagtā hai

har ek zarra-e-manzil chamakne lagtā hai

vo jis ne pī ho zarā sī bhī eqtidār kī mai

har ek bazm meñ kyā kyā bahakne lagtā hai

banāne vaalī ho paivand-e-ḳhāk jis ko havā

vo ġhuncha vaqt se pahle chaTakne lagtā hai

nigāh-e-shauq meñ shāmil jo ho ḳhulūs-o-niyāz

naqāb-e-rū-e-daraḳhshāñ sarakne lagtā hai

tumhārī mahkī huī zulf ke tasavvur se

mirā jahān-e-taḳhayyul mahakne lagtā hai

kabhī kabhār jo hotī hai chaah piine kī

nigāh-e-nāz kā sāġhar chhalakne lagtā hai

qarīb-e-shām havā.eñ jo aah bhartī haiñ

kisī kī yaad kā kāñTā khaTakne lagtā hai

shab-e-firāq kī zulmat-farosh vaadī meñ

vo māhtāb-e-tamanna chamakne lagtā hai

dabā chukā huuñ jise ḳhāk-e-dil meñ maiñ yā-rab

vo sho.ala az-sar-e-nau kyoñ bhaḌakne lagtā hai

rukā huā thā jo āñkhoñ meñ jaane kyoñ 'maġhmūm

vo buuñd buuñd lahū phir Tapakne lagtā hai

qadam jo rah-e-mohabbat mein thakne lagta hai

har ek zarra-e-manzil chamakne lagta hai

wo jis ne pi ho zara si bhi eqtidar ki mai

har ek bazm mein kya kya bahakne lagta hai

banane wali ho paiwand-e-KHak jis ko hawa

wo ghuncha waqt se pahle chaTakne lagta hai

nigah-e-shauq mein shamil jo ho KHulus-o-niyaz

naqab-e-ru-e-daraKHshan sarakne lagta hai

tumhaari mahki hui zulf ke tasawwur se

mera jahan-e-taKHayyul mahakne lagta hai

kabhi kabhaar jo hoti hai chah pine ki

nigah-e-naz ka saghar chhalakne lagta hai

qarib-e-sham hawaen jo aah bharti hain

kisi ki yaad ka kanTa khaTakne lagta hai

shab-e-firaq ki zulmat-farosh wadi mein

wo mahtab-e-tamanna chamakne lagta hai

daba chuka hun jise KHak-e-dil mein main ya-rab

wo shoala az-sar-e-nau kyon bhaDakne lagta hai

ruka hua tha jo aankhon mein jaane kyon 'maghmum

wo bund bund lahu phir Tapakne lagta hai